Cabugao, Ilocos Sur – Iti pannaki-amad ti Web In-Action iti Hunio 21, 2017, imbaga ni Municipal Rice Program Coordinator Nathaniel B. Galamgam, AT, nga adda 50 nga ektarian a naraepan kadagiti barangay a makauna nga agtalon iti panagrugi ti talon iti Wet Season 2017 (Hunio-Nobiembre).
Innayon ti Municipal Rice Program Coordinator a dakkel ti maitultulong kadagiti mannalon iti pagpadanumanda iti kaadda dagiti makinaria nga inted ti LGU-Cabugao kasta metten dagiti hose a pagsisinnublatanda nga usarenda tapno mapasay-akanda ti talonda uray iti masakupan ti adda irigasionna ken adda bubon wenno small farm reservoir-da.
Iti masakupan ti adda agtultuloy a pananumanna a kas iti irigasion, kuna ni Mr. Galamgam a manamnama a matalon iti umabot ti 1,600 Ektaria a mararaepan idinto ta nasurok a 600 Ektaria met iti Rainfed Area ken 40 Ektaria iti mainayon a namulaan ti pagay. Agdagup iti nasurok a dua a ribu nga ektaria ti tinawen a mataltalon iti Munisipalidad no la ket ta awan ti dumteng a tikag.
Kabayatanna, impakaammo ti Municipal Rice Program Coordinator ti Cabugao nga agtultuloy latta iti panagbisitada kadagiti barangay ken iti disso dagiti Techno-Demo ti Hybrid ken Certified Seeds agraman iti Seed Production Area tapno maiwanwanna dagiti mannalon (Cooperators) ken kakaduana a Destino a Teknisian ken aktual a maalana iti pakaseknan dagiti mannalon.
Dagitoy nga aksion ken inisiatiba ket maigapu iti agtultuloy a suporta ti LGU-Cabugao iti Agrikultura iti liderato ni Mayor Josh Edward S. Cobangbang tapno maragpat latta ti “Rice Sufficiency Status” para kadagiti umili ti Cabugao, Ilocos Sur. # (Web Situational Report)
No comments:
Post a Comment