Wednesday, June 14, 2017

TURNOVER DAGITI RAMIT-PAGKALAP, INDAULUAN NI MAYOR JOSH EDWARD

Cabugao, Ilocos Sur – Naaramid ti Turn-over Ceremony of Fishery Projects a nagatendaran dagiti Opisiales ti LGU-Cabugao iti panangidaulo ni Mayor Josh Edward S. Cobangbang, kameng ti Dardarat Fishermen Association nga idauluan ni Former Brgy. Captain Danny S. Garcia, Opisiales ken pannakabagi dagiti Association ti Fisherfolks iti Barangay Salomague ken ti  Barangay Namruangan, Cabugao, Ilocos Sur. Naangay ti turnover iti Covered Court, Brgy. Dardarat, Cabugao, Ilocos Sur idi Hunio 13, 2017.


Kalpasan ti Invocation ken pannakakanta ti Philippine National Anthem, nag-Welcome Address ni Kagawad John Paul Hadoc. Kimmablaaw ken nagyaman iti LGU-Cabugao nga idauluan ni Mayor Josh Edward S. Cobangbang ta simmangpet manen dagiti nagkaadu a proyekto a pakaisagutan dagiti padada nga agkalkalap.

Binagi ni  MFARMC President Danny S. Garcia iti nangiyam-ammo kadagiti maseknan a makaawat a mangngalap ken kasta metten dagiti Opisiales ti ili nga indauluan ni Mayor Josh Edward.

Iti Mensahe ni Mayor Josh Edward,  kimmablaaw ken nagyaman ket  impaawatna  a dagitoy a naited a proyekto ket bunga iti nairut a “partnership”  ti LGU-Cabugao  iti Ahensia ti BFAR ken iti dadduma a sanga ti Gobierno. Dinakamatna  a nadaras a makikammayet ken mangprobitsar kadagiti proyekto ken programa a mangpasayaat ti kasasaad dagiti mangngalap gapu ta nalaing dagiti Opisiales daytoy a Sektor nga agtrabaho.  Pinadayawanna met  ti adu a nagun-od a  pagsayaatan dagiti mangngalap iti kallabes, iti agdama ken iti masanguanan pay a magun-od a proyekto gapu iti nagan ti panagkaykaysa ken kinagaget ti sektor-mangngalap a kayatna a pagwadan ti amin.


Pinagyamanan met ni Former Brgy. Captain Danny S. Garcia kadagiti nagun-odda a ramit-pagkalap babaen iti panangilungalong ni Mayor Josh Edward S. Cobangbang ken ni Pasado Mayor Edgardo “Ediboy” S. Cobangbang a nangikalikagum iti idadateng ti fishery projects iti ili.

Binigbig met ni Former Brgy. Captain Garcia iti kinamannakitinnulong dagiti padana nga Opisiales ti Asosasion iti mangngalap isu a sumangbay dagiti kakastoy a dadakkel nga proyekto nga ited  ti BFAR.

Buklen dagiti naited a ramit iti  Set Long Line; Techno Demo Materials for Aquasilvi Culture; Seaweed Farm Implements ken ti Seaweed Nursery Materials. 

Nagsarita met  ni SBM Atty. Randy Baniaga G. Kinaud,  Committee Chairman on Agriculture. Kimmablaaw ken nagyaman ti Konsehal. Binigbigna  ti kinaganetget ken kinalaing dagiti asosasion ti  mangngalap iti ili a Cabugao ket  komkomplementaran met ti LGU kadagiti irusatda  a mangpasayaat  pay ti kasasaadda babaen iti pannakatarabayda nga aggun-od iti proyekto. Impalagip pay ni SBM Atty. Kinaud iti akreditasion dagiti asosasion iti Munisipio ken iti DOLE tapno adda juridical identity-da. 

Nagpaay nga Emcee ni Mr. Nereo S. Daproza, AT, Municipal Fisheries Coordinator. # (Web In-Action)

No comments:

Post a Comment