Cabugao, Ilocos Sur – Naaramid ti pannakaiyallawat ti makinaria a Tractor a nagun-od ti Eastern Cabugao Corn Cluster Association, Inc. nga idauluan ni Mr. Jimmy Seguban, Presidente, ken Taga- Sitio Rebba, Brgy. Cacadiran, Cabugao, Ilocos Sur manipud iti Departamento ti Agrikultura (DA)-Regional Field Office 1, San Fernando City, La Union.
Naaramid ti turnover ita a Hunio 5, 2017 iti sango ti Cabugao Cultural and Sports Complex, Brgy. Rizal, Cabugao, Ilocos Sur.
Indauluan ni Mayor Josh Edward S. Cobangbang iti pannakai-turnover ti nadakamat a makinaria ken binayabay dagiti Opisiales dagiti mannalon nga immawat iti nadakamat a makinaria kasta metten a nakikaysa dagiti Konsehales ti ili nga isuda SBM Atty. Randy B. G. Kinaud, Committee Chairman on Agriculture ken kasta metten ni SBM Danny Q. Gazmen iti nadakamat a turnover.
Segun ken ni Municipal Agriculturist Robert S. Savella, nagun-od ti nadakamat a makinaria babaen iti naregta a panagkalikagum ti maseknan nga asosasion ti mannalon ken iti panangilungalong ti LGU-Cabugao iti Departamento ti Agrikultura (DA)-Regional Field Office (RFO 1), San Fernando City, La Union.
Innayon ni Mr. Savella a ti nadakamat a makinaria ket napatgan babaen iti Grant a naited iti nadakamat nga Asosasion a naka-base idiay Barangay Cacadiran, Cabugao, Ilocos Sur babaen iti Corn Program ti Gobierno Nasional.
Kabayatanna, impeksa met dagiti Opisiales ti asosasion nga immawat kadaytoy iti panagyamanda iti Departamento ti Agrikultura (DA) iti panangawatdan ti nadakamat a makinaria kasta metten nga agyamanda met iti agtultuloy a panangtarabay ti LGU-Cabugao nga idauluan ni Mayor Josh Edward S. Cobangbang iti pannakagun-odda ti kalikagumda.
Nakikaysa met dagiti DA-LGU Staff nga idauluan ni Municipal Agriculturist Robert S. Savella kasta metten ni Cacadiran Barangay Captain Melito Charito S. Siruno iti nadakamat a turnover. # (Web In-Action)
No comments:
Post a Comment