ORDINANSA TI “NO-PLASTIC BAG DAY” ITI ILI A CABUGAO, NAILUNSAD

Cabugao, Ilocos Sur -  Naaramid ti Launching ti “No-Plastic Bag Day” kalpasan ti Flag Raising Ceremony iti LGU-Cabugao iti Hunio 27, 2017 iti sango ti Flagpole ti Rizal Barangay Hall, Barangay Rizal, Cabugao, Ilocos Sur.

Daytoy a kabarbaro a linteg ket maiyimplimentaren  kalpasan nga inaprobaran ti Sangguniang Panlalawigan ti Ordinance No. 2017-01 nga inesponsoran ni SBM Jemaima S. Tan-Yee, M.D. iti Sangguniang Bayan ti ili a Cabugao, Ilocos Sur.

Iti nasao a launching, imbasa ni SBM Tan-Yee iti pakabuklan ti Ordinansa iti imatang ti Pamilia-LGU nga idauluan ni Mayor Josh Edward S. Cobangbang; dagiti nagatendar a Konsehales ti Ili, kasta metten kadagiti School Heads ti Cabugao DepED District ken dadaulo iti Northern Ilocos Sur Trade Center (NISTC); Public ken Private High Schools a dagitoy iti kangrunaan a pakaisentruan iti makatawen a Pilot Implementation iti nadakamat nga Ordinansa.

Dagiti kangrunaan a panggep daytoy nga ordinansa ket dagiti sumaganad:

1. Regulasyon iti panagusar ti plastic bags/cellophane (Polyethylene) ken Styropor/Styrofoam (Polystyrene (PS)) a pagbungon ken mausar a bagging materials.

2. Panangiparuam iti panagusar iti biodegradable containers a kas iti woven bags (bayong);  cloth bags (katsa); paper bags ken dagiti kapadana a materiales a mangsukat iti  plastic bags/cellophane (Polyethylene) ken Styropor/Styrofoam (polystyrene (PS)) a pagbungon/pagikargaan  ken bagging materials.

3. Mangipromot  ken mangprotehir iti salun-at,  seguridad ken pagsayaatan iti sapasap.

Kanaig daytoy, maideklara iti kada aldaw ti Lunes ti lawas a “NO PLASTIC BAG DAY”. 

Kabayatanna, apaman a naaprobaran daytoy nga Ordinansa ket mabukel ti Task Force nga idauluan ti Punong Barangay, dagiti maseknan a Komite iti Konseho ti Barangay; Solid Waste Management Board ti Munisipio; Municipal Health Office ken iti Municipal Environment and Natural Resources Office (MENRO) tapno agtitinnulongda a mangiwaragawag iti pakabuklan daytoy nga ordinansa iti publiko.

Kasta metten  a dutokan pay  ti Municipal Mayor dagiti Barangay Officials ken Barangay Tanod a tarabayen ti MENRO ken kasta metten  dagiti kameng ti  Kapolisan iti naan-anay a pannakaipatungpal daytoy a linteg. # (Web In-Action)