Tuesday, October 10, 2017

ELDERLY WEEK, SINELEBRARAN DAGITI SENIOR CITIZEN DITOY CABUGAO

Cabugao, Ilocos Sur – Naaramid ti panagselebrar dagiti kameng ti Cabugao Federated  Senior Citizens Association maipapan iti Elderly Filipino Week Celebration iti Oktubre 10, 2017 babaen iti Tema: “Pagkilala sa Kakayahan, Ambag at paglahok ng mga Nakatatanda sa Lipunan”  iti Cabugao Cultural and Sports Complex, Brgy. Rizal, Cabugao, Ilocos Sur. 

Immuna a naangay ti Nasantuan a Misa nga inatendaran dagiti nataengan iti St. Mark the Evangelist Parish Church baben iti panangannong ni Rev. Fr. Felix A. Costales, Parish Priest. Simmaruno a naaramid ti “Walk for Life” dagiti Senior Citizen. 

Kalpasanna, narugian ti programa iti Sports Complex.  Kalpasan ti Opening Prayer, indauluan ni Mrs. Erlinda S. Guerrero ti pannakakanta ti Pambansang Awit ken iti Cabugao Hymn ni Mrs. Corazon S. Suboc.

Panglukat a sarita ti impaay ni  Mrs. Constancia S. Sonido, FSCA Vice President. Kimmablaaw kadagiti bisita  ket nagyaman ta adda latta dagiti Opisiales a dumangdanggay iti aramidenda a panagselebrar.

Nangipaay met ti Mensahena ni ABC President Thaddeus U. Soller. Bininsana dagiti pagsayaatan nga ipatpatungpal ti Gobierno Munisipal kadagiti nataengan iti Munisipalidad. Impalagipna manen a makipaset koma dagiti Senior Citizen iti Session iti Konseho ti Barangay iti lugarda tapno kiddawenda iti 1% a mabatayanda iti Internal Revenue Allotment (IRA) ti Barangay a mainayon iti pundoda a nataengan.

Nangted met ti mensaheda da Vice Mayor DJ Savellano ken ni SBM Bryan Jett S. Pano, Committee Chairman on Social Services.

Nagsarita met ni Retired Judge Efren S. Ubungen ket imbinglayna manen  
dagiti napintas a padasna ken kinaritna dagiti padana a nataengan iti panangipakitada iti pannakidanggayda iti Gobierno a mangkitkita iti pagsayaatanda a nataengan.

Nagsarita ni MSWD Officer Mrs. Lydia S. Gazmen. Indanonna iti nabara a pangkablaaw ni Mayor Josh Edward S. Cobangbang iti panagselebrar dagiti nataengan. 

Kimmablaaw ken nagyaman ni Mrs. Gazmen  iti sapasap ket kunana a taginayonen koma dagiti Senior Citizens iti napintas a timpuyogda tapno umad-adu ti bendision a masagrapda. Bininsana dagiti kangrunaan nga ipatungpal ti Gobierno pakaseknan iti pannakapasayaat ti biag dagiti nataengan nga agtawen iti 60 nga agpangato.

Innayon ti Cabugao MSWD Officer  nga adu pay iti  maaramidan dagiti nataengan ket maikarkararag a madanonda met iti 100 a Tawen a mangipaay kadakuada iti Centenarian Award. Itay nabiit, dua a nataengan iti ili a Cabugao iti nagbalin a Centenarian Awardee.

Iti Closing Remarks, kimmablaaw ni Mr. Bonifacio Somera, Presidente ti FSCA ket nagyaman iti sapasap iti naballigi a panagselebrar dagiti nataengan ditoy nga ili kadaytoy a bulan ti Oktubre 2017. 

Nagpaay nga Emcee da OSCA Head Mr. Remigio Sunico ken ni Miss Aida S. Cueto, MSWD Staff. # (Web In-Action)

No comments:

Post a Comment