Cabugao, Ilocos Sur – Naangay ti pannakaselebrar ti Teachers Day ti Cabugao DepED District a nakipagselebraran ti Local Government Unit (LGU- Cabugao) idi rabii ti Oktubre 5, 2017 iti Cabugao Cultural and Sports Complex, Brgy. Rizal, Cabugao, Ilocos Sur
Nagatendar dagiti Mangisursuro ken School Heads/Principal iti 26 a Pagadalan-Elementaria iti Munisipalidad ti Cabugao kasta metten iti uppat a Sekundaria (Public Schools) ken indauluan ida ni Public Schools District Supervisor Dr. Consesa T. Rumias, Ed.D. Nakipaset met dagiti Opisiales ti Ili ken Empleado iti LGU-Cabugao nga idauluan ni Mayor Josh Edward S. Cobangbang.
Kalpasan ti Opening Prayer ni Mr. Rommel Santella, nakanta iti Pambansang Awit ken iti Cabugao Hymn.
Iti mensahe ni Mayor Josh Edward S. Cobangbang, kimmablaaw, nagyaman ken dinayawna iti maipakpakita a kinaragsak dagiti Teachers iti panagselebrar a kangrunaan a napateg a panangipamatmat iti kinaindaklan ti propesion dagiti Mangisursuro. Innayonna a mayarig dagiti Teachers iti Anghel agsipud ta addada latta a mangiwanwanwan kadagiti naganus ti isipna nga ubbing tapno agbalinda a nasayaat ken naresponsable nga umili iti masanguanan.
Nagyaman ti Ama ti Ili iti pannakaisagana daytoy a panagselebrar ket awan ti pangisukatanna iti napintas a timpuyog ken panagkaykaysa dagiti mangbukel iti DepED District iti Gobierno Munisipal ti Cabugao iti nagan ti panagserbi.
Bininsa ti Ama ti Ili iti pateg iti panangipakita iti agtultuloy a tunos ken timpuyog a kas maysa a napateg a ramit iti napudno a panagserbi ken iti panangtun-oy iti agtultuloy a nadur-as a kagimongan dagiti umili ti Cabugao, Ilocos Sur.
Nangipaay met ti Mensaheda da SBM Dr. Jemaima S. Tan-Yee, Committee Chairman on Education ken ni Dr. Consesa T. Rumias, Ed.D. Anag iti Mensaheda iti napintas a kaipapanan ti panangipasagepsep iti naindaklan nga akem dagiti Teachers iti kagimongan ken iti komunidad. Kasta pay iti panagkaykaysa ti amin a maseknan tapno maaramidda iti akemda a tumulong iti panagballigi dagiti adalanda ken dagiti umili.
Naisaganad ti panaglak-am ti Grasia wenno pangrabii dagiti nagatendar babaen iti panangidaulo ni Miss Mildred Naval iti ababa a kararag a Pagyaman.
Kalpasanna, naaramid ti Zone Presentation a nakabingayan iti lima a Zona (Zone 1 to 5). Iti umuna, nabunot ti 20 a numero iti kada Sona para iti Raffle Draw a pakaalaan ti premio a Payong. Maibabaet met dagiti maipabuya a Group Singing ken sala iti kada Sona.
Indauluan da Mayor Josh Edward ken dagiti Konsehales ti Ili iti agbunot ti numero ken nangiyawat kadagiti premio dagiti napagasatan a nangabak.
Dadduma a naited a premio ket Desk Fan; Television Set ken Personal Refrigeration agraman iti Cash Prizes para iti nagasat a mabunot iti lima a sona.
Nakikaysa met iti selebrasion da Former Mayor Edgardo “Ediboy” S. Cobangbang, Jr. ken ni ABC President Thaddeus U. Soller ken kasta metten dagiti Konsehales ti Ili nga isuda SBM Danny Q. Gazmen; SBM Dr. Jemaima S. Tan-Yee; SBM Vicky S. Serna; SBM Josefina S. Vallejo; ken ni SBM Atty. Randy Baniaga G. Kinaud.
Nagpaay nga Emcee da Arvin M. Manauis; Dharen Jake R. Garcia ken ni Frances Jocel Singson. # (Web In-Action)
No comments:
Post a Comment