Wednesday, October 18, 2017

YOUNG PUBLIC SERVANT 2017, NAGSAPATADA KEN NI MAYOR JOSH EDWARD

Cabugao, Ilocos Sur – Naiparang ken nagsapata dagiti napili a Young Public Servant (YPS) 2017  mangrugi iti Posision ti Mayor, Bise Mayor ken dagiti pakaisaadanda a takem  iti Sangguniang Bayan agraman dagiti Ahensia a nakasalinong iti LGU-Cabugao agingga iti Department Heads ti nadumaduma nga Opisina ti LGU-Cabugao. 


Nagsapatada  ken ni Mayor Josh Edward S. Cobangbang iti Oktubre 18, 2017 iti imatang ti Pamilia-LGU Cabugao iti sango ti Rizal Barangay Hall, Barangay Rizal, Cabugao, Ilocos Sur.

Sakbayna, naelektaran  ni Calvin Kenneth Lopez iti Cabugao  National High School, Brgy. Turod, Cabugao, Ilocos Sur a Young  Mayor ket ni met Nerius Talusig ti Cabugao North Central School ti napili a  Young Vice Mayor.

Kalpasan ti Flag Ceremony, inawagan ni Mr. Dario Roy A. Siruno, Municipal Information and Tourism Officer a saggaysa dagiti naelektaran  a Young Public  Servant iti sango manipud kadagiti nadumaduma a pageskuelaan ti ili ti Cabugao a maisaad iti Opisina ti Mayor, Bise Mayor, Department Heads  agingga iti Sangguniang Bayan ken iti  nadumaduma pay  a Departamento ti LGU-Cabugao.  


Pinagsapata ida ni Mayor Josh Edward  iti imatang ti Pamilia-LGU a pakairamanan dagiti  Department Heads, Municipal Officials ken dagiti pannakabagi dagiti Ahensia iti salinong ti LGU-Cabugao a kas iti PNP ken iti  BFP.

Kalpasanna, nagturong dagiti Opisiales ti Munisipio kadagiti kapadada ti saad a Young Public Servant ket inyaspilida dagiti pin-da.

Iti Mensahe ni Mayor Josh Edward, kimmablaaw ken nagyaman ta maited manen daytoy a pribilehio - pannakaited kadagiti ubbing nga agad-adal a mangakem kadagiti responsibilidad dagiti Opisiales Lokal ken dadaulo ti nadumaduma nga Opisina iti LGU-Cabugao. Kunana nga iti “Public Office is a Trust” ket maipasagepsep iti sapasap ti pannakaitandudo ti Young Public Servant a programa ti Munisipio a pakataliawan dagiti ubbing agsipud ta nakadepender kadakuada iti masakbayan ti ili a Cabugao.

Innayon ni Mayor Josh Edward  a nupay naikkan dagitoy nga ubbing iti nagduduma a Posision ket 
maragsakan kadaytoy a maar-aramid ta addaandan  ti potensial nga agbalin a lider ket mamulida iti pageskuelaan ken iti komunidad. 


Insupusop ti Ama ti Ili nga agyaman unay iti partisipasion dagitoy nga agad-adal kadaytoy a programa ti Munisipio ket kasapulan a maisuroda kadagiti maiparbeng nga aramidenda kadagiti pakaidesignaranda nga opisina.

 “Congratulations! Good Luck!” kinuna ni MayorJosh Edward.

Nagsarita met ni Young Mayor Calvin Kenneth Lopez. Dinakamatna ti kaipapanan ti Pagsasao a dagiti agtutubo isuda ti namnama iti pagilian iti masanguanan. Nagyaman ti Young Mayor ken kinablaawanna dagiti Opisiales ti ili nga idauluan ni Mayor Josh Edward S. Cobangbang; dagiti kaduana a YPS ken dagiti Personnel ti LGU-Cabugao. Innayonna a  babaen iti panagserbisioda ditoy Munisipio ket kayatna a maipaneknek a kabaelanda nga aramiden ken ipatungpal iti nakapilianda ken sinapataanda  a pagrebbengan.

Nakikaysa met dagiti kameng ti Konseho Munisipal nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Atty. Bryan Jett S. Pano; SBM Atty. Randy Baniaga G. Kinaud ken ni SB Secretary Maxfel S. Suboc iti seremonia ti panamagsapata kadagiti Young Public Servant 2017. # (Web In-Action)

No comments:

Post a Comment