Monday, October 9, 2017

KORONASION TI CNCS MR. & MS. SCIENCE CLUB 2017, NAARAMID ITI SPORTS COMPLEX

Cabugao, Ilocos Sur – Naangay ti koronasion ti napili a Mr. & Ms. Science Club 2017 iti Cabugao North Central School nga idauluan ni Mr. Rodel P. Suniega, Principal I idi malem ti  Oktubre 6, 2017 a no sadino a ditoy ket nagatendar dagiti agad-adal, nagannak, guardians, bisita, opisiales ti DepEd Cabugao District ken opisiales ti LGU-Cabugao nga idauluan ni Mayor Josh Edward S. Cobangbang.


Nangablaaw ken nagyaman ni Mr. Nerio Lopez, Presidente ti PTCA-CNCS iti pinget dagiti nagannak a nakikaysa kadagiti mangisursuro ket mangnamnama a kastoy latta ti umay a tawen agsipud ta gunglo daytoy a tumultulong nga agaramid ti aktibidad iti pannakasaluad ti aglawlaw.

Naaramid ti investiture da Mr. Science  Club 2017 John Francis S. Lopez 1st ken ni Dessa Marie Sophia G. Roque 1st,  Ms. Science  Club 2017.


Simmaruno ti panagmensahe ni Mayor Mayor Josh Edward S. Cobangbang.

Kimmablaaw ken nagyaman ni Mayor Josh Edward kadagiti agbasbasa, nagannak, guardians, bisita, Opisiales ti PTA ken ti DepEd Cabugao District, ken kangrunaan dagiti makoronaan a Mr. & Ms. Science Club 2017.

Innayon ti Mayor a napateg ti kakastoy nga aktibidad a paset ti pannakamuli dagiti ubbing. Binigbigna ti sakripisio dagiti nagannak ken gapuanan ti PTA ken mangisursuro iti CNCS ta malaksid iti teoria a maisuro kadagiti ubbing, masursuroda pay ti makigamulo kadagiti napapateg a pakaseknan ti amin a kas iti akem ti siensia iti panagbalbaliw ti tiempo.



Kadua ni Mayor Josh Edward ni SBM Dr. Jemaima S. Tan-Yee, Chairman, Committee on Education ken ni Mrs. Estrellita M. Siruno, Principal II  ti CSCS kas panagsaganadda a kinapareha ti Ama ti Ili a nangorona kada Mr. & Ms.  Science  Club  2017.

Naaramid ti investiture dagiti Runners-up. Kalpasanna, naiyaspili dagiti sashes-da babaen kadagiti nagannak a tinulongan dagiti Advisersda.

Naiballaet dagiti pabuya dagiti Grade Levels a kas intermission number a mangpangayed iti programa.

Sinerraan ni Mr. Rodel P. Suniega, Principal I ti aktibidad. Kimmablaaw ken nagyaman iti adu nangruna iti panagatendar dagiti Opisiales ti Ili a  di agsarday a mangilunglungalong iti pagsayaatan ti pageskuelaan. Nagyaman met kadagiti nagannak a di maum-uma a makidangdanggay ken agsakripisio para kadagiti annakda ken iti eskuela ti CNCS.  #  (Web In-Action)

No comments:

Post a Comment