Cabugao, Ilocos Sur – Naangay ti miting ti Pederasion ti Parents and Teachers Association (PTCA) ken dadaulo ti eskuela-elementaria ti DepEd District ti ili a Cabugao nga idauluan ni Mr. Engelberto Garma (Ret. Teacher) ken Mrs. Helen V. Siruno, Principal 3 ken OIC District Supervisor, Public Elementary Schools kas panagsaganadda.
Umuna a nataming ti Special Education Fund (SEF) nga itultulong ti Gobierno Munisipal manipud iti 1% iti koleksion iti Real Property Estate Taxes (miliar) ti dagdaga iti Munisipalidad ti Cabugao.
Nangablaaw ken nagsarita ni SB Member Vicky S. Serna, Chairman, Committee on Education iti pakaseknan ti mabingay a SEF iti Education Sector ken pannakasigitna para iti 2012.
Iti nagan ti Gobierno Munisipal babaen ti panangidaulo ni Mayor Edgardo “Ediboy” S. Cobangbang, Jr., impadanon ni SBM Serna ti regget ti Alkalde a tumulong kadagiti pageskuelaan tapno maikkanda iti mainayon iti pagkasapulanda kas iti pannakanayon/ pannakatarimaan dagiti pasdek-pagadalan, supplies ti eskuela, textbook, pannakapaadda dagiti kasapulan ti panangisuro, skills enrichment program ti mangisursuro, kasapulan ti ubbing iti nagduduma a kompetision iti ruar ti pagadalan ken operation and maintenance fund ti tunggal pagadalan.
Imbatad ni SBM Serna a saan a maingato ti SEF maibasar iti namunganayanna a linteg malaksid no umadu ti koleksion ti buis wenno miliar ti ili. Daytoy ti gapuna a makitinnulong dagiti nagannak ken uray dagiti mangisursuro iti naan-anay a kampania iti panagbayadan ti miliar ti daga ken balay, innayon ti agpanpanday ti linteg.
Bininsabinsa pay ni SBM Serna dagiti pageskuelaan a naikkanen ti tulong ti SEF kasta met dagiti makasapul pay. Ingunamgunamna nga agaramid dagiti maseknan iti pageskuelaan iti resolusion ket tumulong a mangidatag iti opisina ti Mayor tapno maibirokan ti pakapunduan ti kalikagumda.
Impalagip pay ni SBM Serna ti pananggatang ti Gobierno Munisipal iti Municipal Bus a nalabit tinto DepEd pay ti maysa kadagiti makausar maigapu iti aktibidadesda iti ruar ti pagadalan. Ita pay, addan ti panggep ti DepEd District nga agkiddaw ti lugan iti LGU a mausar iti pannakaibiahe dagiti delegasionda nga agatendar iti Kannawidan Festival nga iwayat ti Gobierno Probinsial iti mabiit.
Naigunamgunam pay ti akem dagiti nagannak a makitinnulongda iti eskuela ken iti LGU a mangited ti “counterpart-da” iti pannakaitrabaho dagiti kasapulan pay iti eskuela a di pay naasikaso.
Simmaruno a natratar ti pundo ti Pederasion. Nagtinnulongan da Mrs. Helen V. Siruno ken Mrs. Melvi S. Sajonia, agpada a Prinsipal ti pannakailawlawag ti nai-turn over a listaan ti pinansial a kasasaad ti asosasion.
Impaganetget ni Mr. Garma, Presidente, ti napateg nga akemda a mangisursuro ken nagannak a katinnulong ti LGU iti pannakapasayaat ti eskuela ken ubbing. Napagnanaminganda pay iti partisipasionda iti umadani a panagpiesta ti ili. # (Web In-Action)
Ti SEF ket madisponer babaen ti panagbinnadang ti DepEd Officials ken iti Local School Board a buklen dagiti sumaganad:
LOCAL SCHOOL BOARD-Cabugao
Mayor Edgardo S. Cobangbang, Jr. – Chairman
Mrs. Helen V. Siruno
SBM Vicky S. Serna
Mrs. Lourdes S. Azcueta
Hon. Benazir Sarmiento, SK Rep.
Mr. Engelberto Garma
Rep., Non-Academic Sector
No comments:
Post a Comment