Thursday, January 19, 2012

AGDINAMAG LATTA TI NIMIA’S MIKI-LUNGGAY!

Cabugao, Ilocos Sur  – Manmano ti makairusat ti industria ti panagaramidan ti miki ngem agdindinamag ita ti  partuat ni Mrs. Nimia Cervas  Naval iti Sitio Cabaroan, Brgy. Cuancabal, Cabugao, Ilocos Sur  iti produktona a  miki-lunggay (nalaokan ti natumek a napagango a bulong ti marunggay) noodles ken  plain  miki. Isu ita ti napili a mangirepresentar ti Munisipalidad ti Cabugao  kadaytoy a kategoria iti Kannawidan Festival 2012  a maangay iti Vigan City.

Nangrugi a nagaramid ni Mang Nimia ti miki idi 2006 nga inyallawat kenkuana ni ipagna a Beatriz Naval Corrales. Napadur-asna daytoy a negosio ket nairehistro iti Department of Trade and Industry (DTI) ken naikonektar iti  Department of Science and Technology (DOST. Babaen ti tulong ni Director Grace Lapastora ti DTI-Region 1, naipromot ti lakona a miki ket sinuplayanna ti Duty Free Paranaque City kasta metten iti JTC Mall ken 2 Brothers iti agdama. Adda met puestona iti tiendaan (NISTC), ti  Cabugao.

 
Idi Disiembre 14-20, 2011, napili ni Mang Nimia nga ag-eksibit ti lakona/produktona a miki ken ti handicraft (recycled) babaen ti RIC  iti 9th Tawid ken Partuat, Ilocos Sur Tourism and Trade Fair a naangay iti Metrowalk Commercial Complex, Pasig City. Daytoy nga exhibit ket ingannuat ti Gobierno Probinsial nga idauluan da Gov. Luis “Chavit” Singson ken Vice Gov. DV Savellano. Napadaywan ni Mang Nimia a nangirepresentar ti ili a Cabugao iti “One town-One Product (OTOP) a nakanayonan ti panaglatak  ti miki-lunggay.

Nupay ngumina  ti arina, P25 pay laeng presio  ti kada pakete  ti miki-noodles (250 grms.)  ken P90/kilo ti plain miki. Adda pay packaging ti miki noodles a para-exportna.

Dagiti kameng ti kaamaanna ti katulonganna iti negosiona a panagaramidan ti miki. Paratignay  ni Mang Nimia ti padas ni ipagna, Mrs. Beatriz N. Corrales a gapu iti miki ket napagturposna  ti uppat nga annakna  iti kolehio. # (Web In-Action)  

No comments:

Post a Comment