Cabugao, Ilocos Sur – Naglataken ti Barangay Pug-os iti nagkaadu a pasalip nga intuyang ti Gobierno Munisipal ken Probinsial babaen iti Siglat Awards kas Hall of Famer ti nadumaduma a tay-ak ti pagsasalisalan.
Iti kalleppas a LAING TI BARANGAY 2011 ti Munisipalidad ti Cabugao, rinangkonna manen ti pammadayaw ket inarusna ti kakaduana a barangay iti panangyalatna ti kampeonato ti walo a kategoria a nakapremiuanna iti P32,000 (sag-P400 kada kategoria) ket manamnama nga entry ita iti Siglat Awards 2011. Maaramid ti Final evaluation ti Barangay Pug-os iti Siglat inton Enero 11-12, 2012.
Ti Barangay Pug-os manen ti maipangruna a barangay a mairanud iti premio ti LGU Cabugao iti pannakagun-odna a kas recipient ti pammadayaw ti “Seal of Good Housekeeping” gapu iti makapnek a pannakaipakat ti transparency ken accountability kadagiti pundo iti LGU Cabugao.
Daytoy a pammadayaw/gatad ket ited ti Department of Interior and Local Government (DILG)-Local Government Support Fund nga agbalor ti P800,000 a pakatungpalan ti arapaap dagiti taga-Barangay Pug-os itan nga isu ti pannakapasayaat ti coastal road ken pannakaaramid ti seawall ti lugarda! Maibagay unay ti impresion ti masa a main-inaw ti Barangay Pug-os a sentro ti turismo iti Munisipalidad no di pay ket potensial pay a daywen ti turista iti Amianan a Luzon.
Kinapudnona, ti Turismo ti maysa kadagiti programa a kayat a pasantaken da Congressman Ryan Luis V. Singson, 1st District, Ilocos Sur ken Mayor Edgardo “Ediboy” S. Cobangbang, Jr. nangruna ditoy Cabugao a pagrubuatan ti urbanisasion ken maidurdur-as a pannakapagbalin ti Port Salomague a kas maysa nga Economic Zone Authority iti masakbayan nga aldaw.
GEOGRAPIA TI BARANGAY PUG-OS
Kas man tinubtubay ti nakaparsuaan a paraiso a daydaywen dagiti managayat iti lang-ay ken napintas a buya ti pakabuklan ti Barangay Pug-os. Saan a narigat a danonen agsipud ta 5 kilometro laeng ti kaadayona manipud iti Poblasion ti ili a Cabugao ket iti sementado a Maharlika Highway ti surotem nga agpaamianan. 27 met a kilometro ti kaadayona iti kabesera ti Vigan City. Mangipaduyakyak nga araken ti turista ti gapu a naipatakder ti Cabugao Beach Resort and Hotel, Amytony Beach Resort, Ponce Del Mar Hotel and Restaurant, Carmeling Beach Resort ken Stella Maris (Catholic) Resort. Mapunno dagitoy a pagtarusan no panawen ti kuaresma, piesta ti ili a panagbakasion dagiti aggapu iti Manila ken balikbayans, Paskua ken dadduma pay nga okasion a mapasamak iti uneg ti pamilia, gunglo wenno institusion. Saan met nga agsarday ti panagburak dagiti nadungngo nga allon iti nadalus ken nalawa nga aplaya iti laud ti haywey a yuyeng ti Baybay Tsina.Kasla matmaturog a Diosa dagiti bantay a nangbennebenneg ti nabaknang a tinaltalonan ken bangkag iti daya-nga-amianan ti haywey ken abagatan-a-laud ti barangay.
Segun iti mapagtalkan a babasaen, namunganay ti Barangay Pug-os iti dakkel a kuton wenno abuos/alumpipineg (red ants) ken mainaig iti “Balaywak” gapu iti kaadu ti agap-apon a billit a nangisit wenno wak idi panawen ti Kastila kas ipaneknek dagiti sinurat iti Historia. Naruay ken nabalkot ti misterio ti karkarna a pasamak ken pakasaritaan ti nawatiwat a sang-atan-salogan a nakaskasdaaw agsipud ta iti unos ti mano a dekada ti napalabas ket saan man a nadappatan ti adu koma a kabalbalbalayan nupay iti agdama adda metten purok ti balbalay iti dadduma a paset ti Balaywak. Nagtalinaed a nasamek a bakir ti kalawaan a paset ti agsumbangir ti haywey a kalsada ket kaaduan met a paset ti masuksukay a napagbalin a sinilong iti dadduma a paset ti lugar. Panawen laeng ti makaibaga no kaanonto a madappatan daytoy a paset ti Barangay Pug-os?
BARANGAY PROFILE TI BARANGAY PUG-OS
Panagtalon, panagmula ti nateng, tabako ken panagkalap ti kangrunaan a pagbiagan dagiti lumugar. Adu metten ti nakangato ti adal ken simmayaat ti biagna ket ti dadduma ket agnaeddan iti siudad ken nadumaduma a paset ti lubong. Kidkiddawen ti gundaway a no mapadur-as ti sistema ti turismo kadaytoy a barangay ket dinto bumurong nga agbalin a sentro ti turismo iti amianan a paset ti Luzon iti asideg a masakbayan.
Addaan ti Barangay Pug-os iti kalawa a no madagup ket 15 ektarias a pagnaedan ti 1,950 a bilang ti agindeg. Rumegregta ti aktibidad ti panagnegosio ti kaaduan a lumugar ken dumayo a komersiante gapu ta bineltak ti National Highway ket pabor dagiti agpuonan iti nalaka a panaggunayda. Naipasdek ti dakkel a bodega ti paglakuan ti birhinia a tabako ditoy Barangay Pug-os. Addaan ti kompleto a pasilidades ti barangay ken eskuela-sekundaria. Kasta met iti nabiit pay a naipasdek nga ospital iti igid ti haywey. Ti Barangay Pug-os ket addaan iti pakadagupan a pundo a 1,222,689.00 iti CY 2011 ket kastoy met ti nakabingayan ti Internal Revenue Share-da (IRA) a 1,180,689.00 kas iti sumaganad:
20 % Development Fund – 236,137.80
10 % SK Fund - 122,265.90
5 % Calamity Fund - 60,984
Ti pakaibanagan ti 20% Development Fund ket iti Concreting ti Farm to Market Road, Infrastructure, Illumination, Indigency Program, Nutrition Program, Education Assistance, Medicine, Clean and Green Program, Day Care Services, Agricultural Services, Fishermen Services, Slope Protection, Maintenance of Gulayan, Child and Youth Welfare Program, Maintenance of Peace and Order, Maintenance of Health Worker Services, Construction of Waiting Shed and Health Center.
Iti sabali a bangir, kayat met nga ibanag ti Sangguniang Kabataan ti 10 % SK Fund-na para iti Environment Protection a mangsaklaw iti Clean and Green, Implementation of Solid Waste Management, Green Brigade, Tree Planting, ken Establishment ti Nursery.
Masakupan pay ti Sports Development Program ti Purchasing of Sports Facilities materials and other paraphernalia. Saklawen met ti Capability Building ti Seminar, Trainings, Lakbay Aral, Annual Dues, Livelihood, Anti-Drug Abuse, ken Subscription ti Anaraar Magazine.
Iparangarang dagiti kaamaan ken lumugar ti Barangay Pug-os a maysa kangrunaan a napateg iti biagda ti pannakaadal dagiti annakda a sarikedkedto ti pamiliada ken iti kagimongan. Adda kompleto nga eskuela-elementaria ken haiskulda a tanda ti panagtutunosda a lumugar a nagkiddaw iti Gobierno Lokal ken Nasional kasta met iti Nursery ken Day Care. Saan a marigatan dagiti agad-adal iti kolehio ta kaapiringda ti National Highway a pagdaliasatanda a mapan sadiay Vigan City, Batac City wenno Laoag City nga ayan dagiti nalatak a unibersidad.
Nalatak a patubo ti Barangay Pug-os ni Retirado a Heneral Pedro G. Sistoza, nag-Commander ti PC-INP iti Rehion Dos ken nag-Direktor ti Bureau of Corrections, Bilibid, Muntinlupa, Metro Manila. Adu pay ti sabsabali a propesional a nakaagpang iti nangato nga adal nga adda iti nadumaduma a posision iti ahensia ti Gobierno ken kaaduan ti agnaeden iti ballasiw-taaw.# (Web In-Action)
DAGITI OPISIALES TI BARANGAY PUG-OS
Arnold Y. Yangat PUNONG BARANGAY
Alfredo C. Lano SANGGUNIANG BRGY. MEMBER
Amorme C. Baclig -do-
Federico S. Sinco -do-
Lorna S. Agustin -do-
Alfonso S. Asunio -do-
Floro Felix S.Baclig -do-
Ernesto S. Talania -do-
Apa Y.Baclig SK Chairman
Milagros B. Belandres Barangay Secretary
Alma A. Claudia Barangay Treasurer
No comments:
Post a Comment