Iti nakaipasdekan daytoy a rangtay ket maysa a historikal a disso agsipud ta ditoy nga immuna a ninanam ni Diego Silang ken ti buyotna iti umuna a balligi iti pannakidangadangda iti puersa dagiti soldado a Kastila idi Disiembre 24, 1762.
“Agyamankami kada Mayor Ediboy ta naidagadag ti pannakaipalawa ti rangtay iti metro nga agsumbangir,” kuna ti kaaduan a motorista , luglugan ken traysikelan iti ili ti Cabugao.
“Nagtengngaan ti nawatiwat a salog ken sang-atan ket dapat a naikalawa a talaga tapno natarus ti panagdaliasat ket maliklikan ti desgrasia aglalo no agragut dagiti agsisinnabat a lugan.”
“Mataginayon koma dagiti kakaywan iti surong tapno maliklikan ti panaggidday ti bakrang ti rangtay,” imbatad ni Lito Garcia, taga-Bessang ken agmulmula ti tabako iti sinilong a naidarnap iti daya-nga-abagatan a sagpat ti rangtay. “Maliklikan koma ti pannakapasapas dagiti kayo ta sarikedked ken mangtaginayon iti napintas nga ubbog iti waig.”
Kinapudnona, inyaramidan ti nagtrabaho ti rangtay ti bassit a “catchdam” ti surong ti rangtay a nangikamangan dagiti asideg nga agindeg ditoy ti “siphonic hose” a mangsuplay ti paglabada iti sirok ti rangtay ken iti babaenna. Nausar ti waig iti pagkasapulan ti danum dagiti umad-adun nga agindeg iti Sitio Balaywak.
Iti pannakapapintas ti rangtay, adu ti biahero ti mangisingasing a mataripato/madebelop ti kabakiran ti surong ti rangtay a potensial a mapagbalin a tourist destination ditoy aglalo ta historikal a disso a nagrekuridaan ti Maingel a Mannakigubat nga Ilokano, Diego Silang! # (Web In-Action)
No comments:
Post a Comment