PANGSALUAD TI SALUN-AT, PANGGEP TI 3-ALDAW A PANAGSANAY

Cabugao, Ilocos Sur  – Nangrugi ti tallo nga aldaw a panagsanay idi Enero 18, 2012   a napauluan iti “Orientation on Kalusugan Pangkalahatan and Community Health Team Training”  ken aggibus inton   Enero 20, 2012 iti Municipal Conference Hall a nagpartisiparan  dagiti pannakabagi ti  lima a barangays a mabenepisiaran ti 4 P’s kas iti Sabang, Pug-os, Dardarat, Namruangan ken Daclapan a buklen dagiti Kapitanesda,  Barangay Health Workers, Kagawad,  Chairman, Committee on Health, nagannak nga opisiales ti 4 P’s (0-14 tawen ti ubbing) a dagitoy ti mapusgan a mangbukel ti Community Health Team a mangipatungpal kadaytoy a programa ti salun-at.

Inlawlawag ni LGOO Connie Quinola nga ituding ti  panagsanay iti (Joint Memorandum Circular of “Kalusugan Pangkalahatan” Implemementation)  a programa ni P-Noy (Aquino Health Agenda)  a pannakasaluad ti salun-at iti sapasap ket akemen ti DILG ti tumulong iti  pannakaipatungpal daytoy a seminar.

Iti anag ti mensahe ni Mayor Edgardo “Ediboy” S. Cobangbang, Jr., kinunana  a  mapagyamanan iti umili ti Cabugao  daytoy a  programa ti Nasional a Gobierno a maipatungpal kadagiti lima a barangays a masakupan ti 4 Ps (Pantawid Pamilyang Pilipino Program). Innayon ni Mayor Ediboy a maitrabaho ken maipatungpal koma daytoy a programa babaen   iti positibo a resulta a pakalag-anan ti biag dagiti umili ken maipakita a natulnog nga agtungpal ti ili ti Cabugao kadagitoy a programa ti Gobierno Nasional.

Innayon ti Alkalde nga agtultuloy  ti pammati dagiti umili iti Gobierno Munisipal   iti pannangtedna iti legal ken patas a serbisio. Kinomendaran  pay ti Mayor ti gaget ken regta   dagiti agtartarabaho iti RHU ken MSWDO  a mangit-ited ti napintas a serbisio kadagiti barangays  ken maiparikna unay  kadagiti   umili a  mangbukel  ti 83 porsiento a mannalon   a makasapul pay  iti serbisioda.  Dinakamat pay ti Ama ti Ili  a mapagyamanan  ken    ni Mr. Benjamin Castillo, Jr.  ta makatulong unay iti kailianna ditoy  Cabugao.

Nayam-ammo ken nagsarita ti baro a Rural Health Physician, Municipal Health Office (MHO) nga isu ni Dr. Lotgarda Tayao.  Dinakamat ti Doktora   ti akem ti opisina  ti Municipal Health Office a kas  “frontliners ken health providers” kadagiti  barangays.  Sapasap a tinnulong a  mangsaluad ti salun-at a prayoridad ken itandudo daytoy nga administrasion  para iti nadur-as nga ili   ti impaawat   ni SB Member,   Dr. Carlito S. Pano, Chairman, Committee on Health ken Social Services  kadagiti nagseminar ken agtartarabaho para  iti benneg ti salun-at. Bininsa met ni Mrs. Lydia S. Gazmen, MSWDO ti pateg ken akem  ti napintas a  salun-at a mangsolbar ti kinakurapay.

Iti panangrugi ti seminar, nayam-ammo dagiti Provincial Trainors a da: Ms. Beverly Ramos, DOH Representative, Cabugao,  Ms. Aster Pasion, Nurse V, DOH Rep., ken Jeffrey Pablico,  PHTO, Vigan City. Nagatendar met ni Mrs. Minerva Fernandez, sigud a DOH Rep. ti Cabugao.

Bininsa ni Mr. Benjamin Castillo, Jr., Leader, Provincial Health Team Office (PHTO),  ti pakabuklan ti KP (Kalusugan Pangkalahatan). Maysa a kangrunaan a topikona  ti pannakaipatungpal ti “awan koma ti  matay nga aganak ken ubing a maipasngay” ditoy ili a Cabugao. Dinakamatna ti pannakabangon ti Lying-in Center ti Munisipio a makatulong unay a   pakatamingan dagiti agpasngay nga inna tapno natalgedda ken maliklikan daytoy a problema. 

Iti umuna nga aldaw, lecture ti mapasamak ken actual demonstration/practice iti sumaruno a dua nga aldaw (Enero 19-20)  kadagiti barangays a masakupan ti 4 Ps.

Nagpaay nga Emcee/ Facilitator  ni Mrs. Janet Sison, Nurse ti RHU-Cabugao.  # (Web In-Action)