NARNUOYAN TI BANAG TI MITING TI CISTODA

Cabugao, Ilocos Sur  – Naangay ti emergency meeting ti Cabugao, Ilocos Sur Tricycle-Operators and Drivers Association (CISTODA)  idi Enero 11, 2012 iti Municipal Conference Hall a no sadino a ditoy ket nakiragup  ni Mayor Edgardo “Ediboy” S. Cobangbang, Jr. a nangted ti napateg a pakaammo  kadagiti traysikelan ti ili a Cabugao.

Iti nasao a miting, naimpormaran dagiti pangulo ti traysikelan ti kada Barangay iti pannakaamendar ti Municipal Ordinance 2006-04, Tricycle Fare Law babaen ti napanday ken naaprobaran a Municipal Ordinance 2011-06 a mangituyang iti umisu a gatad a pagplete ti pasahero iti traysikel iti naibinsabinsa a pagturongan ken rota ti agpaspasada iti intero a Cabugao.

Nakonsiderasionan  ti Senior Citizen agsipud iti 20% discount iti minimum a P10 a plete, P 7 ti agbasbasa basta saan nga aglabes ti 5 kilometro manipud pagtaengan daytoy.

Naipaulog pay ti pagplete ti pasahero iti rabii (9pm-4am) a di labsan ti mamindua a singir (kas koma no arkila)  iti regular fare (P10).
Mamulta ti P5,000  iti umuna a panagsalungasing;  P1,000 iti maikadua ken makanselar ti prangkisa iti maikatlo a daras.

Imbatad ti Alkalde nga obligasion ken pagrebbengan ti panagbayadda ti prangkisa ken lisensia nga agoperar ta naisaguday iti maysa a paglintegan ti ili a pinanday ti kallabes nga Administrasion.

Nupay kasta, agtalek ni Mayor Ediboy iti kabaelan dagiti traysikelan a mangpapigsa ken mangpolisa ti bennegda tapno maliklikan dagiti panagsalungasing a maaramid dagiti drivers a pakaobligaranda nga ag-community service kas maar-aramid iti agdama. Ngem ketdi,   suportaran ti LGU dagiti  igannuatda a pagsayaatan para iti asosasionda.

Nagyaman dagiti traysikelan iti panangaprobar ni Mayor Ediboy ti kalikagumda  a  pannakaited ti  kabukbukodan a linong ti pagparkinganda nga aguray ti pasaherosda  nga aramiden ti LGU apaman nga adda pundo.

Kaaduan a kameng ti asosasion  ti  nangiparipirip  ti kaririknada a sakbay koma  a maikkan ti prangkisa ken pammalubos  a maipasada ti maysa a traysikel   ket maamiris pay no nakarehistro met laeng  daytoy iti LTO.

Napagkaykaysaanda pay a mapagtutulagan nga umuna iti las-ud  ti asosasionda no umanamong ti ad-adu a bilang ti miembros  dagiti kalikagum a pannakaipasublat  dagiti pundo a naurnong ti asosasion kadagiti miembros.

Ti CISTODA ket maysa kadagiti transport group a maik-ikkan ti subsidies ken dadduma pay a pabor manipud iti Gobierno Nasional ken Munisipal  a mayusar iti pannakamantener ken operasion ti asosasionda. (Web In-Action)