CABUGAO FEDERATED FARMERS, NAGMITING

Cabugao, Ilocos Sur – Naangay ti binulan a miting ti Cabugao Federated Farmers Association nga idauluan ni Mr. Elmer G. Bromeo iti pagtaengan ni Kagawad Benigno  Piros iti Barangay Rizal, Cabugao, Ilocos Sur idi Pebrero 7, 2012.

Dagiti natratar ken napagnanamingan:

• Napagsasaritaan  ti  pannakaadda ti maited a  “Saranay” kadagiti kameng a pumusay.  Adda mabayadan a Membership Fee ken  Annual Fee a  maisangrat pay  nga usaren ti asosasion iti panagmitingna ken kanaigna a pakasapulanda. 
• Mairugi pay laeng ti panagmiembro ti Saranay   iti  Opisiales ti Pederasion/asosasion ket main-inut nga agsaknap inton agangay iti ikub ti asosasion. 
• Maisubmiter ti dua a  photocopy ti Certificate of Registration ken Constitution and By-Laws dagiti kabarbaro a nairehistro nga asosasion para iti akreditasion iti LGU-Cabugao. 
•  Maisubmiter  ti updated masterlist ti miembros ken opisiales ti kameng nga asosasion iti Pederasion para iti pannakapasayaat ti rekord. 
•  Ited dagiti kameng nga asosasion dagiti kopia ti resolusionda iti  Pederasion  para  iti pannakaiprosesona a bayabayen  ni Mrs. Ester P. Aguimbag, pannakabagi ti DA-LGU. 
•  Naiwaras ti mailako a tickets  iti tunggal asosasion para iti raffle draw inton Abril 21, 2012 nga isayangkat ti Pederasion.

Kamaudiananna, nagsarita ni Mr. Nereo Daproza, Municipal Rice Program Coordinator  ti DA-LGU maipapan iti ilungalong ti Departamento ti Agrikultura iti Demo-Farm ti Organic  Farming.

Napagkaykaysaan ti pangrugian (pilot area)  a pakaipakatan daytoy a programa idiay Barangay Marga-ay. Nagatendar met da Municipal Agriculturist Zenaida S. Andrada ken MAFC Chairman Rogelio Barlolong iti nasao a miting. # (Web In-Action)