Cabugao, Ilocos Sur – Paset ti panangmiting ti kompania ti Lucky Star Tobacco Trading Center ti pannakaiwaras dagiti cartolina-sized a naimprenta a babasaen a naggapu iti Philip Morris-Fortune Tobacco Corporation, Inc. babaen ken ni Mr. Chris Nelson, Presidente ti nagkammayet a kompania a panangikalikagumda a saan a makilaok dagiti ubbing iti panaggamulo ti industria ti tabako. Paset ti programa ti kompaniada a mangiparit ti panangannong dagiti ubbing iti trabaho dagiti nataengan iti panagmula/panagpagango ti tabako tapno maliklikan ti pakaseknan-legal ken krusada iti anti-child labor ken pakaapektaran pay ti naganus a salun-at dagiti ubbing nangruna kadagiti taga-aw-away, segun iti pammalagip ti Kompania.
Naangay ti miting idi Pebrero 14, 2012 iti Cabugao Cultural and Sports Complex a dinar-ayan dagiti mannalon ti Tabako ken opisiales ti Tobacco Trading Centers. Naglektiur dagiti resource persons ti nasao a kompania ti tabako.
Daytoy ti maikadua a panagmiting ti PMFTC, Inc. kadagiti mannalon ti tabako ditoy Cabugao. Umuna idi napan a tawen 2011 sakbay ti panagbunubon ken panagmula. Ita a panagpapagango, mangmitingda manen tapno matarabay dagiti mannalon a mangpasayaat ti kalidad ti gango dagiti bulong ti tabakoda ken mairapin latta a mapagsasaritaan manipud panagsemilia agingga iti panaggatud a paset ti produkto a birhinia a tabako kasta met ti panagusaran ti umisu a ganagan ken insektisidio ken pannakaiyaplikarna iti umisu a panawen ken kaadu.
Iti agdama, ti tabako ti kaaduan ita a naimula iti Dry Crop Season 2011-2012 (November-May) iti kadagupan ti pagtatalonan ti ili a Cabugao. Di malibak a daytoy a produkto ti nabayagen a nakatulong kadagiti kaaduan a mannalon a rimmuk-at ti kinakurapay gapu ta napagadalda dagiti annakda babaen ti panagmulada/produktoda a tabako. Malaksid itoy, mairaman ti Gobierno Lokal iti Municipal Share ti Tobacco Excise Tax nga intandudo ti Republict Act 7171. # (Web In-Action)
No comments:
Post a Comment