LANGA TI ESKUELA, DUMURDUR-AS TI SISIM NHS

Cabugao, Ilocos Sur  – Ti kinaaktibo dagiti mangisursuro iti Sisim National High School a mangannong kadagiti pagrebbenganda nga agisuro ken mangkiddaw kadagiti kasapulanda  a mainayon a  pasilidad ken ramit ti pageskuelaanda ket tanda ti pagilasinan ti dumurdur-as a kasasaad  daytoy a kaippasdek a pagadalan-publiko  iti ruar ti Poblasion ti ili a Cabugao, Ilocos Sur.
Kastoy ti pammaliiw ti kaaduan a lumugar ti Barangay Sisim nga idauluan ni Brgy. Captain Ruben Siruno ken dagiti kaarrubana  a  barangay a makarikna iti pagsayaatan nga itden ti eskuela-sekundaria.   
Iti pannakaisar-ong ti Web In-Action iti ikub ti pagadalan, napagdamaganda  ni Mrs. Rosemelinda D. Baclig, Officer-In-Charge  iti nainayon a  pagdur-asan ti eskuela.
Imbatad ti OIC a nakaaramidda ti baro a  Comfort Room para iti lalaki iti  ken babai iti likud ti eskuela  babaen ti tulong  ni Mayor Edgardo “Ediboy” S. Cobangbang, Jr. ken ti Parent-Teacher  Association (PTA)  ti eskuela nga idauluan ni Mrs. Zeny Sevilleja-Baclig.

Innayon ni Ma’am Rosemelinda a pinapintaan pay ti PTA ti School Stage ken ti sango ken likud ti naaramid a pagyanan/paglinongan nga istraktura  ti agbuya iti ampir ti basketball court.

Malaksid kadagiti naipaayen  a pasilidad ken ramit  manipud iti LGU Cabugao babaen ti liderato  ni Mayor Ediboy  ken iti  Kongresional babaen ken ni Diputado Ryan Luis V. Singson, First District, Ilocos Sur,   agtultuloy latta a ragpaten ti pagadalan dagiti mainayon pay a kasapulan a pasilidad ken ramit kadagiti masanguanan nga aldaw, segun iti OIC Principal.  # (Web In-Action)

Ti pakabuklan ti Teaching Staff ti Sisim National High School nga idauluan ni OIC Rosemelinda D. Baclig