Tuesday, May 21, 2013

BRGY. BONIFACIO, UMAD-ADU TI PROYEKTO KEN GAPUANANDA

Cabugao, Ilocos Sur – iti pannaki-amad ti Web In-Action idi Mayo 20, 2013, imbatad ni Brgy. Captain Valentin S. Tuyor, Jr. a naggigiddan ti proyektoda ita a bulbulan kas kadagiti maipatpatakder a  20 nga streetlights iti nadumaduma a kalye ti barangay  a pinunduan ti 20 % Development Fund ti barangayda; pannakaipatakder ti solar light nga indonar ni Governor-elect Ryan Luis V. Singson iti ampir ti Covered Court-da;  pannakainstolar ti basketball court  (Fiberglass) nga imbaklay ti SK Fund nga idauluan ni SK Chairman Arvin Jay Manauis  iti mausar, pannakapinta ti asul iti ngatuen ti amin a covered canal, dredging ken pannakadalus dagiti Creek canal iti masakupan ti barangay, pannakapasayaat dagiti proyektoda iti Environmental Management Program kas iti Herbary, Material Recovery Facility (MRF), Nursery, Backyard Gardening, Compost Pit ken pannakaidalimanek ti basura babaen ti nagkammayet a programa ti barangay ken ti LGU iti Solid Waste Management Program.

Innayon ni Brgy. Captain Tuyor a maigapu iti nadalimanek a panamaglalasinda iti basurada ket agiinnuna dagiti indibidual a  mangala kadagiti naurnong a basurada.

Iti naaramid a dredging/cleaning  iti waig ti Brgy. Bonifacio, immasistir ni MENRO Edgar  S. Balangatan, AT/DA-LGU ket imbatad ti MENRO a maaramid met iti nasaknap a panagdaldalus ita a bulan tapno mapaksiat ti “dengue” ken monitorenda met  dagiti dadduma a barangay ken naregget a pannakaipatungpal ti Environmental Management Program a direktiba ti Local Chief Executive iti barangay,  pageskuelaan, kadanuman ken coastal barangay  mangrugi itoy a bulan ti Mayo 2013.

Malaksid kadagiti proyekto a maipatpatungpal iti Brgy. Bonifacio iti agdama, consistent awardee pay  ti nasao a barangay kadagiti pasalip ti LAING TI BARANGAY ken SIGLAT Awards iti agdama ken kallabes a tawtawen. # (Web In-Action)

No comments:

Post a Comment