Cabugao, Ilocos Sur – Iti pannaki-amad ti Web In-Action iti Mayo 14, 2013, imbatad dagiti Rural Health Personnel a mangtartarawidwid ti Admission Table nga agduduma ti pakaseknan dagiti umay agpakita ti kasasaadda kas iti inna, maladaga, nataengan (lakay-baket), agkabannuag, ubbing ken agtutubo.
Iti Medical Check-up, kaaduan nga an-annayen ti agpanateng-aguyek, aggurigor ken agpa-Blood Pressure (BP) dagiti agparikna. Sumarsaruno met dagiti maladaga a mabakunaan. Naregta dagiti umili nga agpakonsulta iti RHU gapu ta nasaknapen ti programa a pannakataming ti salun-at iti barangay babaen kadagiti sanga ti programa ti DOH nga ipatpatungpal ti LGU kas iti Kalusugan Pangkalahatan, Anti-Malnutrision, 4 P’s (Health Care) ken ti akem dagiti Barangay Health Workers (BHW’s) ken Barangay Nutrition Scholars (BNS’s) a mangpasayaat ti salun-at.
Ti madagdagus a pannakataming dagiti an-annayen ken kaadda iti madadaan a maited nga agas ket gubuay iti agtultuloy a panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti napintek a programa ti salun-at para iti umili tapno naregtada a makipagbangon iti naprogprogreso pay a pagilian. # (Web In-Action)
No comments:
Post a Comment