Cabugao, Ilocos Sur – Ti pannakaipalawa/pannakasemento ken pannakatarimaan ti Maharlika Highway babaen iti Department of Public Works and Highways (DPWH) iti kawatiwatan a dalan iti masakupan ti Brgy. Sagayaden ken Brgy. Cuancabal, Cabugao, Ilocos Sur ket mangipapaay ita ti naannayas a panagdaliasat dagiti motorsiklo ken lugan ta nasemento ti agsumbangir nga abaga ti highway ken nasimpa ti linabag ti kalsada nasional.
Iti pannaki-amad ti Web In-Action kadagiti commuters ken agug-uggor ti de-makina a lugan nga agdaldaliasat ditoy ket palalo ti yamanda ta maitultuloy a mapalawa ken mapasayaat ti Kalsada Nasional.
Innayon dagiti Commuters a napasimpan ti sumrekan iti Provincial Road iti Brgy. Cuancabal a kumamang kadagiti adu a barangay iti daya nga abagatan ti Poblasion gapu ta nairaman a nasemento dagiti sumrekan a kalsada a komunektar iti National Highway.
Imbatad ti kaaduan nga agdaldaliasat a dakkel met ti akem ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakikammayetna iti Ahensia ti DPWH tapno agtultuloy a mapapintas ken mapalawa ti Kalsada Nasional iti masakupan ti ili a Cabugao, Ilocos Sur. # (Web Situational Report)
No comments:
Post a Comment