Wednesday, May 22, 2013

BRIGADA ESKWELA, MAISAYSAYANGKAT ITI CABUGAO SCS

Cabugao, Ilocos Sur – Maisaysayangkat ti Brigada Eskwela iti Cabugao South Central School apaman a narugian iti Salomague Elementary School a nagbisitaan ni DepED Undersecretary Alberto T. Muyot.

Iti pannaki-amad ti Web In-Action idi Mayo 21, 2013, imbatad ni Mrs. Melvi S. Sajonia, Principal II a tunggal kuarto ti pageskuelaan ket agdangdanggay dagiti mangisursuro ken nagannak nga agurnos ken agdalus agraman iti arubayan ti eskuela.

Innayon ti School Principal a maar-aramid ita ti pannaka-repair  iti daan nga alad ti   sango ti eskuela babaen iti pannakausar ti pundo ti PTA, Alumni Donors ken dadduma pay a donasion ken tulong pinansial a naggapu iti naayat ti panagpuspusoda a tattao   tapno maisayangkat daytoy a proyekto.

Dagitoy a gannuat ti pagadalan ket paset ti pannakaisagana ti pageskuelaan iti panagseserrek ti klase dagiti ubbing iti Hunio 3, 2013. Maaramid ti enrolment dagiti agbasa iti Mayo 27-Mayo 30, 2013 iti Cabugao South Central School, segun pay iti School Head. # (Web In-Action)

No comments:

Post a Comment