Cabugao, Ilocos Sur - Ti Municipal Government ti Cabugao, Ilocos Sur nga idauluan ni Mayor Josh Edward S. Cobangbang babaen iti implementing arm-na nga iti Municipal Disaster Risk Reduction Management Council (MDRRMC) ket nangaramid ti earthquake drill sadiay Cabugao National High School, Barangay Turod, Cabugao, Ilocos Sur ken idiay Cabugao Institute idi Pebrero 15, 2018.
Babaen iti uni ti alarma, dagiti estudiante ken agad-adal kadagiti nadakamat a pagadalan kas panagsaganadda ket naikkanda iti pammilin a rummuarda kadagiti kuartoda ket simmaruno a nagtignay dagiti kameng ti search and rescue personnel operation team a buklen dagiti kameng ti Cabugao Rescue a mangbukel ti MDRRMC a nagturong kadagiti kuarto a pangkitaanda kadagiti nagakem a biktima iti ginggined.
Tinulongan dagiti kameng ti Municipal Police Station ken iti Bureau of Fire Protection (BFP)-Cabugao ken kasta metten a tinaming dagiti kameng ti Medics nga ibagian dagiti Personnel iti RHU-Cabugao dagiti natakuatan/nairuar a biktima ket naipanda iti Stage Area ken iti Incident Command Post. Napakatan iti First Aid dagiti biktima.
Kabayatanna, ti ceremonial venue iti national drill ket naangay idiay Quezon City Memorial Circle, Quezon City.
Naipaganetget iti sapasap iti pannakipasetda iti information drive a masasao a “Bida ang Handa Campaign” babaen iti panangiyuna iti Office of Civil Defense (OCD) itatta a Tawen 2018.
Ti “#BidaAngHanda” ket opisial a “hashtag” ita a tawen ti 2018 iti 1st Quarter National Simultaneous Earthquake Drill (NSED).
Naballigi ken natunos dagiti estudiante ken agad-adal agraman dagiti mangisursuro kadagitoy a pageskuelaan a nakikaysa kadagiti nangipatungpal iti earthquake drill iti Munisipio ti Cabugao. # (Web In-Action)
No comments:
Post a Comment