Cabugao, Ilocos Sur – Naangay ti pannakai-turnover ti Payao Project kadagiti Recipients (10 nga Asosasion) ti mangngalap iti dua a barangay: Barangay Daclapan ken Barangay Namruangan iti Pebrero 6, 2018 iti Barangay Hall, Barangay Daclapan, Cabugao, Ilocos Sur.
Indauluan ni Mayor Josh Edward S. Cobangbang ti nadakamat a turnover ken inimatangan dagiti Kameng ken Opisiales ti Pederasion ti mangngalap iti ili a Cabugao nga idauluan ni Presidente Magno Carbonel iti pannakaiyawat dagiti nadakamat a ramit-pagkalap (sag-innem a fishing gears ken sag-dudua a drum kadagiti asosasion).
Nangipaay ti Mensahe ni Mayor Josh Edward S. Cobangbang. Kimmablaaw ken nagyaman. Dinakamatna ti agtultuloy a napintas a kammayet dagiti Asosasion ken iti LGU ken kadagiti maseknan nga Ahensia kas iti DOLE tapno insegida a maaksionan dagiti kalikagumda.
Binagi ni Mr. Emmanuel H. Hagad, Head, DOLE, Ilocos Sur ti nangted iti Overview ti proyekto. Dinakamatna a napaadda dagiti proyekto maigapu iti proposal ken counterpart ti LGU-Cabugao nga idauluan ni Mayor Josh Edward S. Cobangbang. Innayonna a no napintas ti pannakaiyimplimentar dagitoy a naited a ramit ket manayonanto manen iti ad-adu a proyekto a pagimbagan dagiti mangngalap.
Nagsarita met ni Barangay Captain Charlie Somejo ken ni Mr. Fidel Ancheta, Presidente ti New Daclapan Fishermen Association. Anag ti mensaheda iti nalaus a panagyamanda kadagitoy a naited a proyekto babaen iti DOLE ken iti Counterpart ti LGU-Cabugao.
Nakikaysa ni SBM Danny Q. Gazmen; ABC President Thaddeus “Teddy” U. Soller; Municipal Fisheries Coordinator Nereo S. Daproza ken ni Mr. Edgar S. Balangatan iti nadakamat a turnover ceremonies. # (Web In- Action)
No comments:
Post a Comment