Tuesday, February 20, 2018

GOLD MEDAL TI ARCHERY, INYAWID DAGITOY A PLAYER ITI RIAA 2018!

Cabugao, Ilocos Sur – Nagleppas ti pasalip ti Region 1  Athletic Association Competition (RIAA)  2018 nga insayangkat ti DepED Region 1  idiay Alaminos City, Pangasinan manipud idi Pebrero 11, 2018 agingga iti Pebrero 16, 2018.


Buklen ti 14 a Delegasion ti umaayam ken Coaches/Sports Officials a naggapu iti uppat (4)  a Probinsia: Ilocos Norte; Ilocos Sur; La Union; ken Pangasinan kasta metten iti siam (9)  a Siudad: Laoag City; Batac City; Vigan City; Candon City; San Fernando City; Urdaneta City; Alaminos City; San Carlos City; Dagupan City;  agraman iti RSAC ken ti Regional Office ti DepED Region 1.

Maibasar iti rekord ti RIAA 2018,  adda dua nga umaayam a nangabak  a taga-Ilocos Sur iti Archery nga isuda Kateleen Yanna Marie S. Somera, Grade 10 ken ni Mark Vincent Gorospe, Grade 9, agpadada nga agbasbasa iti Cabugao Institute iti benneg ti Archery a napagsasalipan.

Inabak ni Kateleen Yanna Marie S. Somera, taga-Brgy. Bonifacio, Cabugao, Ilocos Sur  ken anak ni Ms. Marites Sabio Somera ti Gold (30 Meters) iti Archery ken karaman isuna iti Bronze (Team Event) a buklen ti tallo nga Atleta ken Silver – Olympic Event (Team Event).


Uppat met a medalia ti inyalat ni Mark Vincent Gorospe, taga-Brgy. Lapting, San Juan, Ilocos Sur nga agad-adal ita iti Cabugao Institute ket dagiti sumaganad ti inabakna:  Gold (60 Meters); Gold – Individual Event; karaman iti Bronze Team Event) ken ti Bronze (50 Meters).

Nagpaay a Coach ni Mr. Gelacio Piros, mangisursuro iti Cabugao, National High School, Brgy. Turod, Cabugao, Ilocos Sur.

Dagitoy nga atleta ket kamengda ti Delegasion ti Ilocos Sur a nakikontes iti RIAA 2018 ken isuda ti mangibagi iti Region 1 iti maangay a Palarong Pambansa ditoy Ilocos Sur. 


Kabayatanna, nagturong dagiti dua a nadakamat nga Atleta iti Opisina ni Mayor Josh Edward S. Cobangbang idi Pebrero 19, 2018  tapno mangipaayda ti panagkortesia iti Ama ti Ili ken personal nga ipadanonda daytoy a balligi a naragpatda a nakaidayawanda ken iti eskuela ken ili a naggapuanda.

Binayabay ida ni Mr. Gelacio Piros, Coach dagiti nadakamat nga Atleta iti RIAA 2018.  # (Web In-Action

No comments:

Post a Comment