Cabugao, Ilocos Sur – Naangay ti pannakai-turnover ti dua a Payao Project kadagiti Recipients (2 nga Asosasion) ti mangngalap iti Pebrero 6, 2018 iti Covered Court, Barangay Dardarat, Cabugao, Ilocos Sur.
Indauluan ni Mayor Josh Edward S. Cobangbang ti nadakamat a turnover ken inimatangan dagiti Kameng ken Opisiales ti Pederasion ti mangngalap iti ili a Cabugao nga idauluan ni Presidente Magno Carbonel iti pannakaiyawat dagiti nadakamat a ramit-pagkalap (sag-innem a fishing gears ken sag-dudua nga steel bar kadagiti asosasion).
Nangipaay ti Mensahe ni Mayor Josh Edward S. Cobangbang. Kimmablaaw ken nagyaman. Kunana a maipamaysa koma ti pannakapadakkel ti puonan wenno capital dagiti mangngalap tapno agprogreso daytoy a naited a proyekto. Dinakamatna ti agtultuloy a napintas a pannakitinnunos dagiti Asosasion iti LGU ken kadagiti maseknan nga Ahensia tapno insegida a maaksionan ken maited dagiti kalikagumda a mangngalap.
Nangipaay met ti mensahe da SBM Danny Q. Gazmen ken ni ABC President Thaddeus “Teddy” U. Soller. Anag ti mensaheda iti panangipateg ken panangpadakkel dagiti mangngalap kadagitoy a naited kadakuada a proyekto babaen iti DOLE ken Counterpart ti LGU-Cabugao.
Nagsarita met ti pannakabagi ti Konseho ti Barangay nga isu ni Mr. Willie Garcia, Presidente ti Dardarat Malaga and Bangus Growers Association ken agdama a Vice President ti Pederasion dagiti mangngalap iti ili a Cabugao. Pinagyamananna unay dagitoy a naited kadakuada a pagpuonan ket inkumitna nga estimarenda tapno mapaut nga usarenda a pagsapul iti mainayon a pagbiaganda.
Nakikaysa met ni Mr. Emmanuel H. Hagad, Head, DOLE, Ilocos Sur; Municipal Fisheries Coordinator Nereo S. Daproza ken ni Mr. Edgar S. Balangatan iti nadakamat a turnover. # (Web In- Action)
No comments:
Post a Comment