Monday, February 26, 2018

CABUGAO INTER-BARANGAY BASKETBALL TOURNAMENT 2018, NAIRUBUAT

Cabugao, Ilocos Sur – Naluktan ti 2018  Cabugao Inter-Barangay Basketball Tournament idi Pebrero 25, 2018 iti Cabugao Cultural and Sports Complex, Barangay Rizal, Cabugao, Ilocos Sur   ket umuna a naaramid ti Parada a naaramid iti aglikmut ti Poblasion a nagpartisiparan dagiti Basketball Players iti nadumaduma a Barangay, Coaches, Game Officials ken Marching Band. Nangrugi ti Parada  iti Cabugao Cultural and Sports Complex, Brgy. Rizal, Cabugao, Ilocos Sur a disso ti pagsasalipan ken ditoy met laeng a disso  ti pakaaramidan iti Opening Program.


Naisaruno a naaramid ti  Opening Program. Kalpasan ti Opening Prayer ket nakanta ti  Pambansang Awit ken ti  Cabugao Hymn.

Simmaruno ti Welcome Remarks  ni SBM Atty. Bryan Jett S. Pano, Committee Chairman on Sports. Inawisna ti imatang dagiti umili a mangbuya kadaytoy a kangrunaan a parang/pagteng  ti sports nga aramiden dagiti  umaayam iti barangay.

Innayon ni SBM Pano  a daytoy a paay-ayam  ti LGU-Cabugao ket panggepna nga ital-o ti kasasaad ti  sports, napintas a panaglalangen, kooperasion, panangyadayo kadagiti agtutubo iti madi a bisio.

Kalpasan a naaramid ti Yell  Per Team, nangited ti Mensahe ni Mayor Josh Edward S. Cobangbang. Kimmablaaw ken nagyaman   ti Ama ti Ili kadagiti agsasalip ken kasta metten kadagiti amin a naitaripnong iti Sports Complex.

Imbinsana ti pateg iti pannakipaset  dagiti agtutubo iti programa ti Munisipio iti Sports. Kinunana a mataginayon koma ti panagkakadua; panaggagayyem ken “I wish all the best!” insupusop ti Alkalde Munisipal.

Ingunamgunamna pay iti pannakamantener koma  iti sportsmanship dagiti  amin nga agay-ayam. 

Naisaruno a naibasa ti Oath of Sportsmanship babaen iti Basketball Player ti Brgy. Bonifacio.

Naisaganad  ti panagtitipon dagiti Captain Ball ti kada Team ket nakibinnunotda (draw lots)  iti pakaipananda a Bracket (6 a Bracket) kadagiti agpartisipar iti Tournament. 

Naaramid ti miting dagiti Coaches   para iti Game Rules babaen kadagiti Opisiales a mangimaton iti paay-ayam sakbay a  naaramid  ti Ceremonial Toss ti bola iti tengnga iti  nagbaetan ti Basketball Player ti Brgy. Salapasap   ken ti Brgy. Namruangan nga umuna nga agay-ayam babaen ken ni Mayor Josh Edward. 

Nakikaysa met da Vice Mayor DJ Savellano; dagiti Kapitanes ti Barangay a naitallaong nga idauluan ni ABC President Thaddeus U. Soller kasta metten dagiti Municipal Officials nga isuda SBM Danny Q. Gazmen ken ni  SBM Vicky S. Serna. # (Web In-Action)

No comments:

Post a Comment