Cabugao, Ilocos Sur - Ti Bantay Dagat ket paset ti programa ti BFAR (Regional & Provincial) ken iti Gobierno Munisipal nga idauluan ni Mayor Josh Edward S. Cobangbang iti agtultuloy a pannakataming ti pakaseknan ken pagsayaatan dagiti mangngalap ken pannakasaluad ti pagkalapan dagiti umili iti kabaybayan iti ili ti Cabugao, Ilocos Sur.
Impeksa dagiti DFWs iti naan-anay a panagyamanda iti pannakaipaganetget ti pannakatagiben ti kabaybayan ti ili babaen iti tulong ti Gobierno Munisipal ken iti DA-BFAR Regional Office 1.
Nagyamanda iti pannakanayon ti bilang dagiti Deputized Fish Warden a maikkan ti bileg nga agipatungpal iti pagannurotan iti pannakamantener ti umisu a panagkalap ken panangaywan iti rekursos-naturales iti kabaybayan ti ili.
Sakbayna, naangay ti immuna a tallo nga aldaw a seminar-workshop ti Bantay Dagat (Deputization of Fish Warden) a nagpartisiparan idi ti 32 a mangngalap, 6 a Barangay Captains ti 7 a Coastal Barangays ken tallo a pannakabagi ti DA-LGU ditoy Cabugao, Ilocos Sur.
Iti daytoy a panagsanay, nadiskutir dagiti topiko a kas iti sumaganad: Fishing Gear and Fishing Method, Fishery Laws, Anatomy of Blasting Fish, Internal and External Manifestation of Blasted Fish, Criminal Procedures ken Values Education.
Nagpaay a Lecturer dagiti Opisiales ti BFAR ken iti Judiciary iti pakaseknan dagiti legal a banag.
Kalpasan ti Flag Raising Ceremony idi Oktubre 2, 2017, napadayawan dagiti 7 a mangngalap a nagseminar iti Bantay Dagat Training and Workshop idiay Vigan City iti imatang ni Mayor Josh Edward S. Cobangbang ken ti Pamilia-LGU ken timmarabay dagiti Konsehales ti ili nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Josefina S. Vallejo ken ni SBM Atty. Randy Baniaga G. Kinaud, Committee Chairman on Agriculture and Fisheries.
Ni Municipal Fisheries Coordinator Nereo S. Daproza ti agdama ita a mangtartarawidwid kadaytoy a Sektor. # (Web In-Action)
No comments:
Post a Comment