Cabugao, Ilocos Sur – Naangay ti OHANA Medical Mission of Hawaii ditoy ili a Cabugao, Ilocos Sur babaen iti panangesponsor ti Pamilia Sonido, Pula ken iti LGU-Cabugao nga idauluan ni Mayor Josh Edward S. Cobangbang.
Indauluan ida ni Dr. Charlie S. Sonido, M.D. dagiti Medical Staff iti naaramid a panagagas idi aldaw ti Pebrero 2, 2018 iti mismo a Rural Health Unit (RHU) Building, Cabugao, Ilocos Sur.
Dupudop ti napan nagpaagas nga umili tapno gundawayanda ti maipaay a libre a medical treatment ket nakategoria dagiti nagagasanda iti Adult Medication, Dental, Surgery (Minor kas iti operasion ti cysts ken circumcision), Pedia, BP, ENT, OB-Gyne ken Glucose Count.
Umuna nga aramiden ti agpaagas ti agrehistro iti naisibar a lamisaan a pagrehistruan ket maikkan ti Patient Information Form a napirmaan nga ipakita ti maseknan kadagiti agrebbeng a Dodoktor/Medical Personnel ken iti Konsultasion. Sisasagana met dagiti kameng ti Pharmacy a mangipaay kadagiti mainugot nga agas nga alaen ti pasiente.
Timmulong met dagiti Medical Personnel ti RHU Cabugao nga idauluan ni Dr. Mark-Lawrence T. Tirao, OIC Municipal Health Officer kadagiti bisita a Dodoktor.
Daytoy a tignay-sibiko ken medikal ket maar-aramid para kadagiti umili ti Cabugao, Ilocos Sur a mabenepisiaran kadaytoy babaen iti pannakikammayet ti Gobierno Munisipal nga idauluan ni Mayor Josh Edward S. Cobangbang iti daytoy a Medical Mission.
Naaramid pay ti Luncheon ken nga insagana ti LGU-Cabugao kadagiti sangaili a taga-ballasiw taaw iti SB-ABC Hall kas panangiparikna ti nabara a panangsarabo ti Pamilia-LGU Cabugao ken dagiti umili ti Cabugao, Ilocos Sur kadakuada.
Tinarabay dagiti Opisiales ti LGU-Cabugao dagiti kameng ti Medical Mission iti nagmalem a panagagasda. # (Web In-Action)
No comments:
Post a Comment