Cabugao, Ilocos Sur – Naballigi a naselebraran ti All Saints Day ken All Souls Day idi aldaw ti Nobiembre 1-2, 2018 ditoy ili ti Cabugao, Ilocos Sur kas nasagrado a panawen a pananglagip kadagiti ipatpateg a napanen iti nagkaysa a biag.
Naitampok kadaytoy a dua nga aldaw (Huebes ken Biernes) iti panagmisa ti Kura Paroko iti Catholic Cemetery kasta metten iti Padi ti Philippine Independent Church (PIC) ket nawarisan ti bendision dagiti nitso ken tanem ken kasta met a napatulodan iti karkararag dagiti kararua dagiti minatay.
Imbatad dagiti nagbisita a nupay daytoy laeng ti kadakkelan a gundaway a masurnadan ken makidanggay ti sapasap iti selebrasion, maipakita iti nasged a panangipateg dagiti nagminatay kadagiti minatayda babaen iti pannakaiparabaw dagiti agkakadaeg ken nabalor a sabsabong iti rabaw ti panteon ken nitso, pannakaidasar iti nadumaduma a kita ti taraon ken makan iti uluanan ken sakaanan dagiti panteon ken kasta metten iti nasged a darang dagiti kandela a naitugkel.
Nagpaut ti dua nga aldaw (Nobiembre 1-2) iti kaadu ti tao a nagsarungkar ken idadateng dagiti dadduma pay a bimmisita a naggapu iti nadumaduma a lugar tapno maikkanda ti panawen a mangkita ken manglagip kadagiti minatayda.
Kabayatanna, naregget ti kapolisan a nagbantay iti serkan, uneg ken rummuaran iti sementerio babaen iti panangidaulo ni Chief of Police Senior Inspector Froilan M. Frias, OIC babaen iti “Oplan Ligtas Undas 2018” a programada agraman iti naanus a pannakitinnarabay dagiti Medical Personnel a nangbukel ti Medic/First Aid manipud iti RHU-MHO Cabugao ken dagiti kameng ti Cabugao Rescue.
Naanep met dagiti Barangay Tanod/BPATS agraman dagiti Opisiales ti Barangay Bonifacio a nakitinnakunaynay kadagiti simmarungkar nga umili ken sangaili iti sementerio. # (Web In-Action)
No comments:
Post a Comment