Agtultuloy a pannakapadur-as ti nasayaat a serbisio kadagiti members-consumers ken pannakaipaay ti nalaklaka a presio ti koriente ngem dagiti dadduma a kooperatiba ti elektrisidad.
Dayta ti pinasingkedan dagiti opisial ti Ilocos Sur Electric Cooperative (ISECO) ken National Electrification Administration (NEA) kabayatan ti naangay a programa iti inagurasion ti baro a pasdek ti substation iti Brgy. Nanguneg iti daytoy nga ili itay nabiit.
Pinasingkedan ni General Manager Engr. Egdon Sabio nga agtultuloy ti panangpadur-as ti ISECO iti serbisioda kadagiti members-consumers kalpasan a dandanin makabitan iti linia ti koriente dagiti amin a sitio iti Ilocos Sur agraman kadagiti nasulinek a paset ti probinsia. Inlawlawagna a paset ti pannakapadur-as ti serbisio ket pannakabangon dagiti baro a pasdek ken substation tapno dagiti personnel ket addaanda iti nasayaat a pagtrabahuan, ken dagiti members-consumers a mapan kadagiti opisinada nga agbayad iti electric bills ken makitransaksion ket komportable ken saanda a marigatan.
Impakaammo ti General Manager nga iti kadagupan dagiti 121 nga electric cooperatives iti Pilipinas, mairamanen ti ISECO kadagiti sumagmamano nga adda iti Class A Plus classification gapu iti natalged a financial resources ken dadduma pay nga assets ti kooperatiba, ken ti nasayaat a panangipaayda iti serbisio ken nalaklaka a singir ti koriente no maidilig kadagiti dadduma nga electric cooperatives. Impanakkel a ti ISECO laeng ti mangmangted kadagiti members-consumers iti patronage refund kas panagyamanda iti panangitandudoda iti kooperatiba.
Iti met panagsarita ni ISECO Board of Directors President Atty. Gloria Corrales, impalagipna ti nanumo nga opisina a namunganayan ti ISECO idi 1971 iti maysa a kuarto ti eskuela sadiay Santiago, Ilocos Sur, agingga iti nabangon a baro a main office ti kooperatiba a nainaguraran idi 2017. Inlawlawagna nga ikagkagumaan ti management ti ISECO a pasayaaten dagiti pasilidad ti kooperatiba kagiddan ti pannakapadur-as ti serbisioda kadagiti members-consumers, karaman ti pannakabangon dagiti baro nga opisina ken pasdek a mangipaneknek ti panagprogreso ti ISECO a mabalin a pagpanakkel dagiti members-consumers. Impaganetgetna nga ikagkagumaanda a pasayaaten dagiti opisina ti ISECO, ngem agtalinaed a nalaklaka ti koriente, saan a kas dagiti dadduma nga electric provider a napintas dagiti opisinada, ngem nangina ti lakoda nga elektrisidad.
Iti mensahe ni NEA Administrator Edgardo Masongsong, binigbig ken dinayawna ti kinadur-asen ti ISECO a maysa kadagiti sumagmamano a kadur-asan a kooperatiba iti kadagupan dagiti 121 nga electric cooperatives iti Pilipinas. Pinadayawanna ti kinapinget ken kinapudno ti panagserbi dagiti mangimaton ken personnel ti ISECO tapno magun-od ti total rural electrification iti probinsia. Impakaammona ti tarigagayna a pannakaibaba pay ti bayad ti koriente ken ti agtultuloy a pannakapadur-as dagiti amin nga electric cooperatives iti Pilipinas babaen ti naan-anay a suporta ti Kongreso. Impakaammona a ti Philippine Rural Electric Cooperatives Association, a gunglo dagiti amin a kooperatiba iti pagilian, ket adda dagiti tallo a nominanado para iti partylist representative iti House of Representatives pakairamanan ni Atty. Corrales ti ISECO.
Sakbay ti programa, naangay ti Nasantuan a Misa nga indauluan ni Rev. Fr. Felicisimo Ferrer, Our Lady of Mt. Carmel Parish Administrator, ken pannakabendisir ti pasdek. Ti pannakaputed ti laso ti baro a substation ti kooperatiba ket indauluan dagiti opisial ti ISECO, NEA, PHILRECA, ken Narvacan Municipal Government.
Naangay ti ISECO Annual General Membership Assembly iti nagsasaruno a Sabado manipud idi Nobiembre 10, 2018 sadiay Candon City, Tagudin ken Santo Domingo a nakitaripnongan dagiti opisial ti NEA, management ken dagiti members-consumers para kadagiti gannuat ken programa ti kooperatiba. Naaramid pay ti paripa a nangabakan dagiti members-consumers kadagiti adu a napateg a premio kas panagyaman kadakuada ti ISECO. # Source - Eden Alviar/Tawidnews
No comments:
Post a Comment