Cabugao, Ilocos Sur – Naangay ti Dialogue iti nagbaetan ti National Tobacco Administration (NTA)-Vigan City; pannakabagi dagiti Tobacco Trading Centers; LGU-Cabugao ken dagiti Tobacco Farmer-Leaders iti Cabugao Cultural and Sports Complex, Barangay Rizal, Cabugao, Ilocos Sur idi Nobiembre 6, 2018.
Iti Opening Program, nagsarita ni ABC President Thaddeus U. Soller ket bininsana ti kasasaad dagiti agmulmula ti tabako ditoy nga ili agraman iti agtultuloy a napintas a pannakaigastos ti Municipal Share ti RA 7171 a pakaisagsagutan met laeng dagiti mannalon iti aspeto ti produksion ti agrikultura.
Nangipaay ni Pasado Mayor Edgardo “Ediboy” S. Cobangbang, Jr. iti panagsarita ket kinablaawan ken pinagyamananna iti amin a nakipartisipar kadaytoy a panagtitipon. Bininsa ti dati a Mayor ti pateg iti panangisakit ti amin iti industria ti tabako gapu iti dakkel a maitulongna kadagiti umili babaen iti pundo ti RA 7171.
Dinakamat ni Mayor Ediboy iti isusuporta ti LGU kadagiti programa ti NTA para kadagiti mannalon ket napasingkedanen kadagiti kallabes ken iti agdama iti napintas a pannakaipatungpal iti pannakausar ti pundo ti RA 7171 babaen iti Gobierno Munisipal ti Cabugao babaen iti pannakatulong a padapada kadagiti mannalon babaen iti ID System.
Innayon pay ni Mayor Ediboy a makitkita ken marikna ti kaaduan iti panangisakit ti Munisipio kadagiti mannalon ken umili nga agsagrap ket daytoy nga agtultuloy a nasayaat a pannakausar ti pundo ket mamantener ken manaynayonan latta iti panagprogreso ti ili.
Nagsaganad a nagsarita da NTA Director Teofilo Quintal ken ni Ms. Minerva Pinera, Branch Manager National Tobacco Administration, Vigan, Ilocos Sur ket inlawlawagda ti naan-anay a kaipapanan ti panagsayaat dagiti agmulmula iti tabako babaen iti programa ti contract growing ken panangpasayaat ti kalidad ti mulada a tabako tapno mamantener iti napintas a presio ti apitda.
Trinatarda pay iti epekto ti Sin Tax Law ti National Government a mabalin a makaapekto iti konsumo ti produkto ti sigarilio. Ngem inlawlawagda a kitkitaen ti Ahensia nga idauluanda iti pagsaysayaatan dagiti tobacco farmers a saanda a maapektaran no di ket mapasayaat pay ti kasasaadda babaen iti direkta a pannakinaming dagiti Kompania ti sigarilio kadagiti mannalon kasta pay iti aspeto ti marketing, pannakaipatungpal dagiti programa ti NTA ken pannakikammayetda kadagiti LGUs a makasakup kadagiti tobacco farmers.
Innayon ni NTA Director Quintal a mainayon pay a kitaen ti opisinana iti pannakatulong dagiti mannalon babaen iti maitutop a programada a para kadagiti mannalon tapno maipanamnama iti nakalidad a produktoda a bulong ti tabako.
Nangipaay met ti pamanunotan dagiti tobacco farmers iti napintas koma a pannakatarabayda nangruna iti merkado ken pananggun-odda kadagiti maipaay a programa ti NTA. Nataming a naan-anay dagiti timmaud a pakaseknan ken iti pannakaaksionda.
Nagpaay a Facilitator da SBM Danny Q. Gazmen ken ni Ms. Cacai Gazmen. # (Web In-Action)
No comments:
Post a Comment