RYAN CORN SEEDS KEN RICE SEEDS, NAITED KADAGITI MANNALON TI CABUGAO

Cabugao, Ilocos Sur – Nasapa ken sigagagar a nagturong dagiti mannalon a tinarabay dagiti Farmer Leaders ken Barangay Officials ti 33 a barangay ti ili a Cabugao, Ilocos Sur iti Cabugao Cultural and Sports Complex, Brgy. Rizal, Cabugao, Ilocos Sur tapno awatenda iti mabatayanda iti maiwaras a Ryan Corn (LVN 10) Seeds ken Bigante Rice Seeds agraman Humus (Soil Conditioner) nga ited ti Provincial Government babaen iti panangidaulo ni Governor Ryan Luis V. Sings

Naaramid ti ababa a programa sakbay ti ceremonial turnover ken distribution iti nasao a pamin-ian a mais ken irik agraman humus/soil conditioner kadagiti mannalon iti Sports Complex iti imatang dagiti Municipal Officials/umili nga idauluan ni Mayor Josh Edward S. Cobangbang ken kasta metten dagiti Opisiales/pannakabagi ti Kapitolio Probinsial nga idauluan ni Vice Governor Jeremias “Jerry” C.  Singson ken kasta metten dagiti pannakabagi ti Office of the Provincial Agriculture (OPAG); Municipal Agriculture Office ken dagiti   Opisiales/Kameng dagiti Asosasion ti mannalon ti Cabugao.

Nagsaruno a nagsarita da SPM Efren “Rambo” Rafanan; SPM Constante Oandasan; ken ni SPM Mika Mendoza. Anag ti Mensaheda ket iti panangikasoda kadagiti dimteng a kalamidad a nakaapektar kadagiti mannalon ket pagrebbengan ti Provincial Government iti mangted ti tulong ken saranay kadakuada.

Nangipaay ti Mensahe ni Mayor Josh Edward. Kimmablaaw ken nagyaman nangruna iti Gobierno Probinsial nga idauluan da Gov. Ryan Luis V. Singson ken ni Vice Gov. Jerry C. Singson. Impeksa ni Mayor Josh Edward iti panagyamanna ken dagiti umili ti Cabugao a maikkan iti tulong ket imbagana a maiwaras a pakasagrapan ti pagsayaatan iti sapasap a mannalon ken sangsangkamaysa koma dagiti mannalon a mangbigbig kadaytoy a nagun-od a pagimbaganda ket mangnamnama ti Alkalde Munisipal nga agballigi latta daytoy a programa  dagiti mannalon iti ili.

Nangipaay ti Mensahe ni Vice Governor Jeremias “Jerry” Singson. Kimmablaaw kadagiti nagatendar a mannalon a tinarabay dagiti Opisiales ti Barangay ken ti Munisipal nga idauluan ni Mayor Josh Edward. Innayon ni Vice Gov. Jerry a maysa laeng a paset ti adu a programa ti Gobierno Probinsial ti Agrikultura iti pannakaited ti Ryan Corn Seeds  ken Ryan Rice Seeds ket imbagana a paaduen/usaren koma dagiti mannalon daytoy a naited kadakuada ta agtultuloy latta nga isagsagut ni Governor Ryan iti pagsayaatan dagiti mannalon iti ili ti  Cabugao ken iti intaramente a Probinsia.

Innayon ti Bise Gobernador a saan a paudi ti ili a Cabugao a maikkan iti tulong babaen iti panangtarabay ti sibubukel a Gobierno Lokal nga idauluan ni Mayor Josh Edward.  Kunana a tulonganda iti amin a sektor ken agtultuloy dagitoy a maited  kadagiti mannalon. Isuda a mannalon ti makaammo iti kasapulanda ket ur-urayen ti Kapitolio Probinsial dagiti maidatag pay a resolusion kadagiti kiddawenda.

Nakikaysa dagiti kameng ti Konseho Munisipal kadaytoy a ceremonial turnover nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee ken ni ABC President Thaddeus “Teddy” U. Soller agraman dagiti Kakapitanes ken Opisiales dagiti barangay ken Asosasion dagiti Mannalon.

Nagatendar met da  Mr. Marcelino Alibin; Mrs. Lolita Arce ken dagiti empleado ti Kapitolio Probinsial ken Office of the Provincial Agriculture (OPAG) ti Ilocos Sur a tinarabay dagiti pannakabagi ti Municipal Agriculture Office nga idauluan ni Mr. Robert S. Savella. #  (Web In-Action)