Cabugao, Ilocos Sur – Inrubuat ti intero nga umili ti Cabugao ti pannakaselebrar ti National Children’s Month iti bulan ti Nobiembre 2018 babaen ti panangtarabay ti Gobierno Munisipal nga idauluan ni Mayor Josh Edward S. Cobangbang ken iti panangtarawidwid ti opisina ti Municipal Social Welfare and Development Office (MSWDO) babaen ken ni Mrs. Lydia S. Gazmen, Municipal Social Welfare and Development Officer ken ti Federated Child Development Workers’ Association nga idauluan ni Mr. Ferico Arcebal idi Nobiembre 21, 2018 iti Cabugao Cultural and Sports Complex, Brgy. Rizal, Cabugao, Ilocos Sur.
Nagatendar dagiti Child Development Workers (CDWs) kadagiti barangays ken kasta met dagiti nagannak a nangkuyog kadagiti nakisalip nga ubbingda iti Singing ken Draw and Tell Contest a naitampok iti aktibidad.
Ni Mrs. Lydia S. Gazmen, Municipal Social Welfare and Development Officer ti nangipaay ti panglukat a sarita.
Inyam-ammo ni Miss Aida S. Cueto, Municipal Link dagiti mangbukel iti Board of Judges nga isuda Ms. Jovita R. Roxas, MRB-DSWD; Ms. Leonora G. Reintar, Social Welfare Assistant ti LGU-Cabugao ken ni Mr. Kevin S. Somera, Cabugao Municipal Youth Coordinator.
Iti mensahe ni Mrs. Gazmen, kimmablaaw ken nagyaman kadagiti amin a nagatendar iti nasao a selebrasion ket dinakamatna ti napateg a panangipamaysa ti Gobierno Munisipal iti panangidaulo ni Mayor Josh Edward S. Cobangbang kadagiti pagsayaatan ti programa ken pannakaprotehir ti karbengan dagiti ubbing.
Innayonna a daytoy a panangipamatmat dagiti ubbing kadagiti talento ken abilidadda ket bunga ti napintas a pannakaisuroda iti biang dagiti Child Development Workers ken dagiti nagannak.
Kabayatanna, naiwaras met dagiti babasaen maipapan iti nagkaadu a karbengan ken panangproteksion ti linteg kadagiti ubbing ken babbai. Naibinsabinsa iti pateg ti panangrespetar ti kaaduan iti kalintegan dagiti ubbing agsipud ta dakkel ti kaibatoganda kadagiti napanday a linteg nupay addada iti menor de edad a kasasaad.
Naikkan ti premio dagiti nangabak iti Singing ken Draw and Tell kalpasanna.
Nakikaysa met dagiti pannakabagi ti linteg iti Municipal Police Station. # (Wen in-Action)
No comments:
Post a Comment