PANAGTAGIKUA TI DAGA, TAMINGEN TI PROGRAMA TI DAR

Cabugao, Ilocos Sur – Agtultuloy ti panangtulong ti Departament of  Agrarian Reform (DAR),  Municipal Office babaen ti panangimaton ni Engr. Constante R. Raras, Caretaker ti Municipal Agrarian Reform Office ti ili a Cabugao kadagiti umili nga adda pakaseknanna ti daga  tapno matun-oyan  ti talged ken simbeng ti kapanunotan dagiti  benepisiario a mangtagikua ti daga a suksukayenda babaen ti panangtungpalda kadagiti annuroten nga inyetnag ti DAR.

Segun ken ni Engr. Raras, umaboten ti 72  iti bilang ti umili nga immawat ti titulo nga “Emancipation Patent” (EP)   nga inggunggona ti DAR ken agnaed dagitoy nga immawat ken masarakan ti loteda  iti masakupan ti    Barangays Catucdaan, Sabang ken Carusipan.  Addan  ti  23  nga ektarias ti bilang ti  daga a naibunong.

Sadiay Barangay Maradodon, impakumitda  iti DAR ti pannakabingay ti  nalawa a daga kadagiti maseknan a bumarangay. Naballigi daytoy a gannuat  ket  naidian ti adu a taktak ken gastos iti  pannakaiwaras  dagitoy, innayon ni Engr. Raras. Imbaga pay ti Inheniero nga adda kapadpadana a pakaseknan iti Barangay Nagsincaoan ket determinado ti opisinada a marisut ti problema iti  sumagsaganad nga aldaw.

Babaen ti panagreport  ni Engr. Raras ken ni Mayor Ediboy pakaseknan dagitoy a gapuanan ti MARO, naragsakan ti Mayor ta napintas ti pagan-annayasan dagiti pakaseknan iti panagtagikuaan ti dagdaga a masakupan ti  programa ti DAR  iti ili ti Cabugao. # (Insurat ni Joed Sajonia)

BARANGAY PEACEKEEPING ACTION TEAM (BPAT) TI CABUGAO, NANGRUGI A NAGSANAY

Barangay Peacekeeping Action Team (BPAT) bayat ti seminarda

Cabugao, Ilocos Sur – Maar-aramid ti panagsanay dagiti kameng ti Barangay Tanod ti umuna a bansada ti 11 a barangays tapno maiyataday ti plano ti Gobierno Nasional  a mapagbalin a naan-anay a katulonganen ida ti kapolisan ti pannakamantener ti linak ken talna ti sangkapagilian.
    

Aganay nga 123 dagiti nagpartisipar iti umuna nga aldaw, Setiembre 8, 2011 a  no sadino a ditoy ket naaramid ti orientasion ken pananggun-od ti kabaelan babaen ti seminar a maited babaen iti Department of Interior and Local Government (DILG)-Philippine National Police, benneg ti Munisipal, Probinsial ken Rehional.
    

Nabatad ti mensahe ni Mayor Ediboy S. Cobangbang, Jr. a babaen iti pannakasanay dagiti Barangay Tanod a mangakem  ti dakkel ken  umarngi  a pagrebbengan ti kapolisan, manayonan ti panagtalek ti bagi ken bukodda a kabaelan, mataginayon  ti kinataknengda  kadagiti umili gapu iti talek a naited kadakuada nga agserbi, mapagsarmingan kadagiti tagipatgen a galad ken mayanninaw   ti kinaanus, kinamanagayat ken kinamannakaawat kadakuada  iti tattao  ditoy ili a Cabugao.

Iti panangited ni Mayor Ediboy iti mensahena kadagiti BPAT

Maysa pay a napateg a banag a nadakamat ni Mayor Ediboy  ti panangad-adalda ken ni PNP Provincial Director, P/SSupt. Reynante G. Partible iti pannakaited ti seguro wenno insurance kadagiti makapagsanay ti BPAT.
    

Pammadayaw ken pammigbig ti bugas ti mensahe da Police Provincial Director Partible ken SPO3 Orlando Cacdac, Training Director iti naregget a panangawat ti Gobierno Munisipal nga idauluan da Mayor Ediboy ken Vice Mayor Danny Q. Gazmen  iti pannakaisagana dagiti  kasapulan iti panagsanay ken napintas a bilang ti nagpartisipar iti umuna nga aldaw ti seminar.
    

Dagiti Barangays nga umuna nga agsanay a nangbukel ti 123 a nagatendar ket ti Barangays Baclig, Bonifacio, Arnap, Bato, Cacadiran, Aragan, Bungro, Catucdaan, Alina-ay, Carusipan ken Cael-layan.
    

Sumarsaruno nga agsanay dagiti Barangay Tanods ken opisiales  ti dadduma a barangays babaen iti mayeskediul a petsa. Maminpinsanto ti panagturpos dagiti batches ken panangawatda ti sertipikoda  a manamnama a dar-ayan ni Congressman Ryan Luis V. Singson ti Umuna a Distrito, Probinsia ti Ilocos Sur, segun ken ni PO3 Vivian Natividad, Facilitator ti Seminar.
     

Iti panaglukat ti seminar,  nagsarita met ni  Cabugao Chief of Police  SPO4  William N. Nerona, ket ni  PO3 Vivian Natividad, ti nagpaay  nga emcee ken Facilitator.
    

Kalpasan ti ababa a programa, dagus a narugian ti lektiur ket nayadal iti dua nga aldaw ti  maipapan iti law enforcement, internal security, Republict Act 9262, karbengan ti ubbing ken babbai,  naannayas a panangiwardas ti trapiko, panagipilaan ti kaso ken  panagasikaso ti biktima no  mapasamak ti  krimen ken umisu nga aramiden kabayatan ti kaadda ti uram ken nadangran. # (Insurat ni Joed Sajonia)

(L-R) Training Director SPO3 Orlando Cacdac; Cabugao Chief of Police  SPO4  William N. Nerona; Mayor Ediboy: PNP Provincial Director, P/SSupt. Reynante G. Partible: Vice-Mayor Danilo Gazmen; Police Inspector Rodel Ularte

COASTAL CLEAN UP TI PITO A BARANGAYS, PAGTITINNULONGAN TI NADUMADUMA A SEKTOR

Cabugao, Ilocos Sur – Pito (7) a barangays ti kangrunaan a makasakup ti kabaybayan ti ili a Cabugao. Dagitoy  ti Barangays Pug-os, Daclapan, Salapasap, Sabang,  Namruangan ken Salomague.
Babaen  ti programa ti Coastal Resource Management (inter-agency)  nga  idauluan ti Gobierno Munisipal,  ti DA-LGU ti  nangmobilisar kadagiti nadumaduma a sektor a tumulong iti linawas a pannakadalus ti igid ti baybay  kadagitoy a nadakamat a barangays  nangruna  ta kasibsibet dagiti bagyo a nangpataud ti wara ken rugit.

Nupay kasta,  maipatungpal latta ti panagdaldalus  iti igid ti baybay manipud  ti  bulan ti Enero agingga iti Disiembre tapno mapreserbar ti breeding area dagiti ikan, imbatad  ni Mr. Edgar S. Balangatan,  Municipal Technologist ken Municipal Environment and  Natural Resources Officer-Designate ti LGU-Cabugao.   

Segun kada Mr. Robert Savella ken Mrs. Milagros Ramirez-Paz, agpada a Municipal Technologists ken  Fisheries Coordinator ti LGU-Cabugao, makitintinnulong dagiti gunglo ti mangngalap, Konseho ti Barangay, Rural Improvement Club (RIC), 4-H Club, Benepisiario ti 4’Ps ken agbasbasa nga ubbing iti pannakaipakni dagiti rugit ken maidaknir a kayo ken bulbulong iti igid ti baybay.

Naaramid ti nasaknap a panagdalus ti grupo idi Setiembre 7 sadiay Barangay Dardarat, Setiembre 9 sadiay Barangay Daclapan, ken Setiembre 10 sadiay Barangay Salapasap. Linawas met ti maaramid a panagdalus ti grupo iti parte ti Barangays Pug-os, Sabang, Namruangan ken Salomague.

Dagitoy nga aktibidades ket mayataday  iti programa ti Gobierno Munisipal ken Ahensia a  maseknan  babaen ti panangiwanwan da Mayor Ediboy S. Cobangbang, Jr. ken Mrs.  Zenaida S. Andrada, Municipal Agriculturist ti LGU-Cabugao. # (Insurat ni Joed Sajonia)

Iti naaramid a clean up iti Brgy. Road ti Brgy. Dardarat

Clean up ti igid iti baybay iti Brgy. Dardarat

Iti naaramid a clean up sadiay Mangrove Site iti Brgy. Dardarat

Iti naaramid a clean up iti Brgy. Road ti Brgy. Salapasap

DAKKEL A MAKINARIA TI LGU-CABUGAO, NAGATANG BABAEN TI PUNDO TI RA 7171

Agsipud ta kasapulan unay ti nayon a heavy equipment ti Gobierno Munisipal, inlungalong ni Mayor Ediboy S. Cobangbang, Jr. ti pannakapaadda ken pannakagatang ti dakdakkel a makinaria kas iti bulldozer tapno maaksionan a daras dagiti pagkasapulan a matarimaan/malukatan a proyekto-impraestruktura ti LGU-Cabugao.

Naisangpet ti nasao a heavy equipment (D 85 P, Komatsu) idi Setiembre 9, 2011 ket naitalek iti opisina ti General Services Office (GSO) babaen ken ni Mr. Edito de la Cruz, License Inspector ken GSO-Designate ken mangtarawidwid iti Motorpool ti LGU-Cabugao.

Imbatad ni Mr. de la Cruz nga ipamaysada ti mentenansia daytoy a makinaria tapno episiente a mausar a para iti pagkasapulan ti Gobierno Munisipal kadagiti maaramid a proyekto ken panagtarimaan ti kalsada ken kaarngina a pasilidad.

Nagatang daytoy a makinaria manipud iti bingay ti Munisipio iti pundo ti RA 7171. # (Joed Sajonia)

TALLO A LAMISAAN KEN 120 MONOBLOC ARMCHAIRS, INTED NI CONG. RYAN SADIAY SISIM NATIONAL HIGH SCHOOL

Cabugao, Ilocos Sur – Paset ti programa ni Mayor Ediboy S. Cobangbang, Jr. ti pannakaitandudo ti edukasion kadagiti umili nangruna kadagiti barbarangay nga adayo iti pageskuelaan ti sekundaria.

Iti pagdurdur-asan ti kasasaad ti eskuela, adda umabot a 60 nga estudiante ti First Year Level a nagenrol iti CY 2011-2012.

Segun ken ni Sisim Brgy. Captain Ruben Siruno, dakkel a pribilehio daytoy a naited a pannakaipasdek ti eskuela-sekundaria iti barangayda ta dagiti nagturpos ti elementaria itay CY 2011 ditoy lugarda ket isuda ti kangrunaan a nagenrol ti pagadalan iti umuna a tukad ti sekundaria ken manamnama pay nga isudanto manen ti manglitup iti umag-agpang a year level ti pageskuelaan iti sumaruno a panagbabasa. 

Itay Setiembre 7, 2011, nangted ti opisina ni Congressman Ryan Luis V. Singson, Umuna a Distrito ti Ilocos Sur ti tallo a lamisaan ken 120 a monobloc armchairs kas pangtulongna ti kasapulan ti nadakamat a pagadalan-sekundaria.

Manamnama a masolbaren ti pakaseknan dagiti agkakadarapat a barangays maipapan iti panagbasa dagiti annakda iti haiskul kas iti Maradodon, Catucdaan, Cael-layan, ken Alinaay ta mawidawidanen dagiti ubbing a mapan agbasa kadaytoy a naluktan a pagadalan. # (Insurat ni Joed Sajonia)

MANAYNAYONAN TI BILANG TI MAKI-DAYO ITI TUNGGAL SABADO

Cabugao, Ilocos Sur (Setiembre 3, 2011) - Maigapu ti sasangpet ti Bagyo Mina idi Agosto 27, 2011, adu ti transaksion a nasuspender ngem nasulnitan ken naituloy iti Setiembre 3, 2011 a no sadino a ditoy ket immadu ti trakan a nagidayo ken nagbunag ti magatang nga ayup manipud iti dayo ken tattao a nakidayo.

Segun kada Dr. Melvin Castro, Livestock Inspector ken Mr. Dante Naval, Meat Inspector, agpada a pannakabagi ti Gobierno Munisipal, nagtalinaed a naurnos, naingayyeman ti maar-aramid a panaggiginnatang ken panaglilinnako iti las-ud ti dayo. Adda met latta dagiti maibabaet nga aglako iti burias, kalding ken babassit a dinguen. 

 

Gapu iti pannakaluom metten ti gundaway a panaglalangen dagiti maki-dayo, naaramid ti pannakaorganisar dagiti koridor ken cattle traders idi Setiembre 3, 2011 tapno adda mangsustener ti napintas a panangrugi ti dayo kas maysa a paset ti napintek a programa a nairubuat babaen kada Mayor Ediboy S. Cobangbang, Jr., Vice Mayor Danny Q. Gazmen ken ABC President, Brgy. Captain Teddy U. Soller para kadagiti agtartaraken a mannalon.

Babaen ti panangiwardas dagiti pannakabagi ti DA-LGU, dagiti sumaganad ti nabutosan: Marciano Raciles, Presidente; Desiderio Sait, Bise Presidente; Elpidio Mejia, Sekretario; Rudy Quileza, Tesorero; Venus Peria, Assistant Treasurer; Melchor Raciles, Auditor; George Baclig, Danilo Zamora, PIO’s; Marcos Aquino, Dencio Garcia, ken Nestor Raciles, Sergeant-at-Arms.

Agmiting ti organisasion iti tunggal umuna a Sabado ti bulan.# (Joed Sajonia)

CONG. RYAN, INAMMONA DAGITI DINADAEL TI BAGYO MINA ITI CABUGAO

Cabugao, Ilocos Sur (Agosto 29, 2011) – Paset ti panagbisita ni Congressman Ryan Luis V. Singson dagiti naapektaran ti Bagyo Mina ti idadaw-asna iti Municipal Hall ti ili a Cabugao, Ilocos Sur idi Agosto 29, 2011 a no sadino ket ditoy a binayabay dagiti pannakabagi ti Gobierno Lokal ket aktual a nagturong ti grupo babaen iti panangigiya da Vice Mayor Danny Q. Gazmen, ABC President Teddy U. Soller, MPDC Florante Jara ken Municipal Engineer Crescencio Marcos C. Formoso kadagiti barbarangay a naapektaran ken sumagmamano nga empleado ken hepe ti opisina ti LGU-Cabugao a naanus a nagbantay iti Munisipio ken nakipagmonitor kadagiti naapektaran a barangay ken umili kabayatan ti panagbasnot ni Bagyo Mina agingga a nagleppas ti bagyo.

Ti panagbisita ni Diputado Ryan Singson iti Brgy. Alinaay, Cabugao, Ilocos Sur, bayat ti kaadda iti bagyo Mina

Maysa kadagiti kinita ni Diputado Ryan ti nadadael nga slope protection iti pagbedngan ti karayan ken kalsada iti Barangay Alinaay a no sadino a ditoy ket impasingked ti Congressman ti madagdagus a pannakaaksion ken pannakatarimaan daytoy a pasilidad, segun ken ni Engr. Formoso.

Sumagmamano pay dagiti babassit a pasilidades a naapektaran ket kasapulanna laeng ti nadaras a pannakatarimaan, innayon ti Inheniero ti Munisipio.

Mangnamnama dagiti bumarangay ti Barangay Alinaay kas imbatad ni Kapitan Melanio Rondon Santella ken kasta met dagiti maseknan nga agdaldaliasat iti asideg daytoy a pasilidad a babaen ti liderato ken panagdanggay da Mayor Ediboy S. Cobangbang, Jr. ken Congressman Ryan Luis V. Singson, matarimaan ti pakabuklan ti Slope Protection iti Barangay Alina-ay. # (Joed Sajonia) 

Iti slope protection a nadadael gapu ti bagyo Mina iti Brgy. Alinaay, Cabugao, Ilocos Sur