UNIT 1 ATHLETIC MEET 2011, KAMPEON TI ILI TI CABUGAO!

Cabugao, Ilocos Sur - Naangay ti Unit 1 Athletic Meet 2011 iti  San Juan Athletic Ground, San  Juan North Central School Compound, Brgy. Pandayan, San Juan, Ilocos Sur  idi Nobiembre 4-5, 2011 a no sadino a ditoy ket nagpartisipar dagiti mangisursuro, napili nga ubbing a mangirepresentar ti nadumaduma a pakisalipan, DepEd Officials, Opisiales ti LGU’s, nagannak a timmarabay ken bisita a nagbuya manipud iti ili ti Sinait, Cabugao, San Juan ken Magsingal.
Iti umuna nga aldaw, Nobiembre 4,  naaramid ti panagparada dagiti delegado iti aglawlaw ti athletic ground sada naguurnong iti Multipurpose Building ti eskuela a nakaangayan ti programa.

Nangted ti Words of Welcome ni  Mr. Jose P. Bueno,  Jr., District Supervisor ti DepEd  San Juan District.

Inrepresentar met  ni Madam Elaine Sarmiento,  kasimpungalan  ni Mayor Bernard D. Sarmiento  ti San Juan iti pannangted  daytoy ti mensahena kadagiti delegado  ket kimmablaaw ken nagyaman ni Mrs. Sarmiento  kadagiti delegado. Impasingked ti Mayora  ti naan-anay a suporta ti Gobierno Lokal ti ili a San Juan  iti pagkasapulan mainaig  iti  dua nga aldaw a panagsasalisal dagiti agbasbasa  iti  eskuela-elementaria  iti uppat a Munisipalidad.

Sepak Takraw - San Juan Vs. Sinait

Kalpasan ti Showdown of Routine ti Sinait District Gymnastic Team, impresentar dagiti pangulo ti delegasionda  iti tunggal ili: District Supervisors Ignacio T. Ubilas, Magsingal; Fe C. Impelido, Sinait; Helen V. Siruno, Cabugao; ken Jose P. Bueno, Jr., ti   San Juan.

Kinadisiplina, panangyintek iti bukod nga event,  ken Sportmanship, ti anag ti mensahe ni Mr. Meneleo B. Palma, CSEE, Education Program Supervisor 1 ti Physical Education on School Sports  (PESS) ti DepEd.  Kalpasan ti intermission ti San Juan District Chorale, naaramid ti Hoisting of Delegation Flags babaen iti panangirepresentar dagiti District Supervisors a tinulongan dagiti District PESS Coordinators  kadagiti Mayores ti uppat nga ili a di nakadar-ay gapu iti  opisial a makagapu: Mayor Bernard D. Sarmiento, San Juan;  Mayor Edgardo S. Cobangbang, Jr., Cabugao;  Mayor Marlon B. Ines, Sinait;  ken Mayor Arlyn A. Favis, Magsingal.

Indauluan ni John Vincent Guzman, SJNCES Pupil ti Affirmation of the Amateur Athletic Oath. Ni Mr. Meneleo B.  Palma, CSEE ti nangipakdaar a maluktanen ti sinnalip a nangirepresentar ken ni Hon. Marino S. Baytec, Ed. D., CSEE, Schools Division Superintendent.

Dagiti nangabak a Munisipalidad a  maibasar iti point-system:  Over-all Champion- Cabugao, 283.5 Points;  1st Runner-up-San Juan, 244 Points; 2nd Runner-up-Magsingal, 212 Points; 3rd Runner-up-Sinait, 207.5 Points.

Ti panagsapata dagiti players sakbay nga agay-ayamda ti nadumaduma nga events

Iti maikadua nga aldaw, Nobiembre 5, 2011, naaramid  ti Closing Program ket impresenta  dagiti Tournament Managers dagiti napili nga atleta  kada Sport Event a makipartisipar iti Ilocos Sur Provincial Meet 2011. Naisaruno ti pannakaited ti award ti Over-all Champion, 1st, 2nd,  ken  3rd  Runner-up babaen ti panangimaton ni San Juan District Supervisor Jose P. Bueno, Jr.

Ni met laeng Superbisor Jose P. Bueno, Jr. ti napusgan a nangserra iti dua nga aldaw a paliga. Nagyaman ti Superbisor kadagiti amin a nakipaset iti naballigi a Unit 1 Athletic Meet. # (Rinetrato ken insurat ni JOED SABIO SAJONIA)

Ni Magsingal District Supervisor Ignacio T. Ubilas kabayatan nga ipresentarna ti delegasion ti ilina

Ni Mr. Meneleo Palma, CSEE, ES 1-PESS kabayatan nga ipakdaarna a mangrugin ti paay-ayam

Volleyball Girls - San Juan vs. Sinait

Chess Competition, Boys, naggigiddan ti uppat a delegasion

Chess Competition, Girls, naggigiddan ti uppat a delegasion

Nangted ti Final Briefing ti Taekwondo Instructor kadagiti agsasalip

Kabayatan nga agsarita ni San Juan First Lady Madam Elaine  Sarmiento kadagiti delegado ti uppat a Munisipalidad

Ni District Supervisor Fe C. Impelido ti Sinait Delegation

Ni OIC District Supervisor Helen V. Siruno ti Cabugao Delegation

Nagpaala ti ladawan dagiti PE on School Sports (PESS) Coordinators nga indauluan da San Juan District Supervisor Jose P. Bueno, Jr. (nakapuraw) ken Mr. Meneleo Palma, CESS, Educ. Program Supervisor 1 PESS (tengnga) kalpasan ti briefingda

HONORARY OFFICIALS
Hon. Mayor  Bernard D. Sarmiento	San Juan	Chairman
Hon. Mayor  Edgardo S. Cobangbang, Jr.	Cabugao	Co-Chairman
Hon. Mayor Arlyn A. Favis	Magsingal	Co-Chairman
Hon. Mayor Marlon B. Ines	Sinait	Co-Chairman
CO-HONORARY OFFICIALS
Hon. Vice Mayor Rizalina Valle	San Juan	Co-Honorary Chairman
Hon. Vice Mayor Alrico A. Favis	Magsingal	Co-Honorary Chairman
Hon. Vice Mayor Amador Macugay	Sinait	Co-Honorary Chairman
Hon. Vice Mayor Danilo Q. Gazmen	Cabugao	Co-Honorary Chairman
SBM Felipe Villa	San Juan	Chairman on Education
SBM Ehlafe E. Yere	Sinait	Chairman on Education
SBM Renie “Lina” Villalobos	Magsingal	Chairman on Education
SBM Vicky S. Serna	Cabugao	Chairman on Education
Fe C. Impelido	Sinait	Head, Delegation
Helen V. Siruno	Cabugao	Head, Delegation
Ignacio T. Ubilas	Magsingal	Head, Delegation
Jose P. Bueno, Jr.	San Juan	Head, Delegation
SK Fed. Pres. April Kaye Vivit	San Juan	Committee on Sports
SF Fed. Pres. Orlino I. Ines	Sinait	Committee on Sports
SK Fed. Pres. Jan Jerome Tolentino	Magsingal	Committee on Sports
SK Fed. Pres. Benazir Sarmiento	Cabugao	Committee on Sports
GENERAL REFEREES
Mr. Jose P. Bueno, Jr.	San Juan	Chairman
Mr. Ignacio T. Ubilas	Magsingal	Member
Mrs. Fe C. Impelido	Sinait	Member
Mrs. Helen V. Siruno	Cabugao	Member
DISTRICT PESS COORDINATORS
Arnel V. Rosario	San Juan
Joselito Urmeneta	Magsingal
Ronaldo Ibe	Sinait
Ronel M. Ubaldo	Cabugao
Nardito M. Yadao	Sinait	District PESS Consultant

UMAS-ASENSO TI AGNEGOSIO DITOY CABUGAO

Cabugao, Ilocos Sur (Nobiembre 5, 2011) –Maibasar iti estatistika, manaynayonan ti bilang ti umay agnegosio ditoy ili a Cabugao  iti pannakataming dagiti pasilidad ti  pagtagilakuan iti Merkado Publiko (NISTC)  ken makatulong pay ti  pannakaaramid/pannakatarimaan  dagiti kangrunaan nga impraestruktura kas iti pannakasemento ti kalsada ti barbarangay a pagdarasan a pagiruaran ti produkto dagiti mannalon, nimmam-ay  ti  panagdaliasat dagiti mapan  aggatang ti kasapulanda iti tiendaan ken pumasiar kadagiti barbarangay, pannakapasayaat ti paggapuan ti mausar a danum, ken natalna a kasasaad ti komunidad segun iti panangamiris ti PNP.

“Pagyamananmi la unay kadagiti  Opisialestayo, Apo, ta nasementon ti kalsadami ngem dawatenmi nga  agsinsin koma  ti pammigbig a maited   iti Bungro saan laeng nga iti Bugnay, Salapasap ti mapadayawan kadaytoy nabirngasan ti “Katuday Avenue”,” impalgak ni Apo Salustiano Sabugo, panglakayen ti Barangay Bungro.

“Napintas ti panagdadanggay dagiti bumarangay ken pangpangulotayo isu nga adu ti magapuananda  itatta nga pagsaysayaatan dagiti taga-barbario,” kuna met ni Apo Prudencio Baclig, panglakayen  iti Barangay Aragan.

 Ti intar dagiti Dry Goods ket adu met latta ti aggatang

“Kayatda ti umay  kumita  kadagiti mainaynayon a pagbalbaliwan ti Munisipio ken ti  serbisio dagiti nakagaggaget nga empleados isu nga nagaget dagiti tao nga umay agbayad,” inlatak met ti maysa a pangulo ti opisina.

Nakatulong  pay  ti dakkel ti  panangbuangay ni Mayor Edgardo   “Ediboy”  S. Cobangbang, Jr. iti Northern Ilocos Sur Trade Center  Task Force nga idauluan ni Waterworks Superintendent Nestor B. Somera  nga agkita, mangtakuat ken  makipagpanunot kadagiti mairekomenda a pangpasayaat pay  kadagiti agtagilako ken aggatang iti tiendaan.

Maibasar iti rekord ti Municipal Treasury, umabot ti 443 ken manaynayonan ti bilang ti nakarehistro ti negosioda a kangrunaan a pakasarakan kadagitoy nga establisimiento ket iti uneg ti tiendaan ken iti ruar  iti igid ti Maharlika Highway.

Iti nakolekta ti taripa ti negosio laeng, umabot iti P344,909.87  ti dinur-asan ti koleksion no pagkomperarem iti Enero-Setiembre 2010 ken ita:  Enero-Setiembre 2011 segun iti Tesoreria ti Ili. Maibasar iti rekord ti Tesoreria ti Munisipio, addan 2,740,086.76 a koleksionda iti “business tax” laeng iti bulan ti Setiembre 2011.

“Malaksid laeng daytoy kadagiti  nakolekta a Fees and Charges  a nayon ti  pamastrekan ti ili,” imbatad ni Mr. Marlon J. Ramos, Administrative Aide 3  manipud iti Municipal Treasurer’s Office.

Mainayon a mangpatibker ti datos a natalged ti ekonomia ti ili iti panagngato ti apit ti pagay (hybrid) a gubuay ti di agsarday a panangilungalong ti Gobierno Munisipal ken Probinsial kasta met ti   DA-RFU 1 iti Cluster Techno-Demo on Hybrid Rice  kadagiti estratehiko a lugar iti pagtatalonan iti ili.

   
Iti 5-Hectare Cluster Techno-Demo on Hybrid Rice a nagsina a  nailunsad iti Barangay Pug-os nga indauluan ni Elmer G. Bromeo  ken Brgy. Namruangan nga idauluan ni Benjamin Castillo,  dinayaw da OIC DA Regional Executive Director Wilma Ibea ken Ilocos Sur Provincial Agriculturist Constante Butacion ta nalabsan pay dagiti farm-cooperators ti “expected yield”  nga 6.5 tons iti 7-10 tons a naapitda iti kada ektaria.

Ti sumrekan iti Merkado Publiko (NISTC-Cabugao)

Imbatad da Municipal Rice Program Coordinator Nereo Daproza ken Municipal Agriculturist Zenaida Andrada nga in-inuten a masursuruan ken umapal  dagiti mannalon nga  agraep ti Hybrid rice. Ita a panagaapit ti Wet Season 2011 (Hunio-Nobiembre),  kangatuan ti  10 tons ti tunggal ektaria ti naapit ti Hybrid Rice. Di agsarday ti DA-LGU a mangilungalong ti panagplano ti ad-adu nga agmula iti Hybrid Rice iti umay a main crop. Segun ken ni Brgy. Captain Edgardo Sonido, sisasagana ti 100 ektariasda a mamulaan para iti Main Crop 2012. Ti Brgy. Turod Patac ti nabansagan a “Top Hybrid Rice Producer” ti ili a Cabugao iti agdama, segun iti DA-LGU.

Iti biang ti livestock sector, imbatad ni Dr. Melvin Castro, DVM, namantener ti napintas a rekord ti panagpatanor ken pannakalako ti  dinguen ken animales. Dakkel ti naitulong  ti pannakabuangay ti Dayo a  nangparegget ti industria ti panagtaraken, segun pay iti agkabannuag a Beterinario.

Iti biang met ti High Value Commercial Crops, imbatad met ni Municipal Technologist Ester Aguimbag a namantener latta met ti napintas a rekord ti panagnateng.  Adu a mannalon ti agmula uray off-season (deretso) ta para konsumo ken para-lako ti masobra a maapit. Innayonna nga awan ti napasamak nga “oversupply” tatta ti produkto a nateng ta epektibo dagiti estratehia a naipakat ti opisinada ken dagiti vegetable growers iti “market outlet” ti nateng. Ipasimudaag ti panagaktiboda ti pannakaorganisar  ti Cabugao Vegetable Growers Association a makikammayet iti Gobierno Munisipal ken dadduma pay a maseknan nga Ahensia a makatulong kadakuada, segun pay ken ni Aguimbag.

Manamnama nga  iti yaadani ti Paskua ti makagapu a naregget ita ti panagtulid ti negosio, segun  iti NEDA Region 01. # (Web Research )

Ti pannakakongkreto dagiti Farm-to-Market Roads (FMR’s) ti kaaduan a makagapu nga immasenso ti negosio, segun iti kaaduan nga opinion dagiti umili

Ti kaikanan ken kakarnean a parte ti tiendaan

Napunpunno dagiti lamisaan dagiti aglako ken nadaras a makraayan ta adu ti aggatang

FEDERATED FARMERS’ MEETING, NAPLANO DAGITI AKTIBIDADDA PARA ITI PASKUA 2011

Cabugao, Ilocos Sur – Naangay ti Regular Meeting ti Federated Farmers’  Association ti ili a Cabugao nga idauluan ni Elmer Guerrero Bromeo  idi  Nobiembre 3, 2011 a no sadino a ditoy ket trinatarda dagiti kangrunaan nga agenda a mangpatibker ti gimongda a mannalon.

Segun ken ni Mrs. Ester Aguimbag, Municipal Technologist ti DA-LGU ken manartarabay kadagitoy nga asosasion ket naregget dagiti asosasion a mangbukel kadaytoy kas ipalnaad ti natulnog a panagatendar dagiti Presidente tunggal regular a mitingda (binulan)  ket mapatuladanda met nga agaktibo dagiti gimgimong ti mannalon nga adda iti sabali a barangay.

Dagiti sumaganad ti natratar iti panagmitingda:

1.   Pannakaiplano ti pannakasingir dagiti naipabulod a kantidad kadagiti nakaala nga asosasion iti soft loan (P23,000) manipud iti Gobierno Munisipal babaen iti  pundo ti RA 7171.

2.    Pannakatulag ti Christmas Program ti Pederasion ken pannakaigannuat ti Raffle Draw a mangparegget dayta nga aktibidadda.

3.   Pannakaistudiar a nasayaat dagiti dadduma pay nga  annuroten ti asosasion nangruna iti attendance ti panagmiting, pannakapapintas ti rekord kas iti updating ti masterlist ti miembros  ken pannakaisurat a regular ti minutos ti miting.

4.    Pannaka-follow up  dagiti naiteden a  resolusion ken maidarirag a proyekto iti Pederasion.

Nakitaripnong ni SB Member Benedict Savellano, Chairman, Committee on Agriculture  iti nasao a miting ket imbagana a kakammayet ken  katinnulongna ti Ehekutibo babaen ken ni Mayor Ediboy a mangiprayoridad kadagiti lehislasion a mangidur-as ti pakaseknan dagiti mannalon.

Imbatad ti SB Member a maragsakanda  a makakita ti kinaregta dagiti Farmer Leaders iti ili ket dida met agtaktak a mangilungalong kadagiti mayataday a proyekto para kadagiti mannalon ken mangngalap. # (Rinetrato ken insurat ni JOED SABIO SAJONIA/Web Research)

BARANGAY SECRETARIES’ LEAGUE, AKTIBO NGA AGMITING ITI TUNGGAL BARANGAY

Cabugao, Ilocos Sur – Aktibo ti pannakipartisipar ita iti pannakamuli dagiti kabarbaro a nadutokan a Barangay Secretaries ti 33 a barangays ti ili a Cabugao iti panangidaulo ni Brgy. Nagsincaoan Brgy. Secretary Ronnie Bringas.

Segun ken ni Secretary Bringas, tunggal umuna a Biyernes ti bulan ti panagmitingda iti Liga ket napagkaykaysaanda nga imbes nga angayenda iti Municipal Conference Hall, agmitingda laengen kadagiti nakaeskediul a barangay tapno maiparikna ti panagkakaduada ken matulonganda a mangsimpa kadagiti nagduduma a rekordda iti barangay.

“Kakuyogmi da Ma’am Connie a mapan mangmiting ket natakuatan nga epektibo daytoy a pangpasinged ti tunggal maysa ken mainayon a padas ken exposure ti ipapan iti sabali a lugar,” imbatad ni Liga President Ronnie Bringas.

Innayon pay ti Liga President nga addan lima a barangays a namitingda itay bulan ti Oktubre 2011: Brgys. Salomague, Dardarat, Pug-os, Namruangan ken Salapasap. Agtultuloy daytoy nga aktibidadda agingga a marikusda ti 33 a barangays.

Ni Mr. Ronnie Bringas, President, League of Barangay Secretaries of Cabugao

Agsipud ta impakita dagiti Barangay Secretaries ti ganetgetda a makipaggamulo kadagiti pakaseknan ti Konseho ti Barangaysda ken pannakitinnunos iti programa ti Gobierno Munisipal, naikkanda ti  pagopisinaan iti 2^nd Floor ti Municipal Building ken usaren a ramit babaen ti direktiba ni Mayor Edgardo “Ediboy” S. Cobangbang, Jr. ken pannakikammayet ti DILG-MLGOO  babaen ken ni LGOO Connie Quiñola.

Dagiti opisiales ti Liga ng mga Barangay Secretaries ti ili a Cabugao ket dagiti sumaganad:

President – Ronnie Bringas

Vice President – Amador Salom

Secretary – Juanita Villegas

Treasurer – Genaro Sapla

P.I.O. – Ma. Janet Simbe

Business Manager – Antonio Sabio

Auditor – Wilfredo Savella

Segun pay ken ni  Liga President Bringas, agaramiddanto ti Action Plan ken One-Year Development Plan ti gungloda tapno marukodda ti gapuananda ken masinunuoda ti turongen dagiti gannuatda iti umay a tawtawen .# (Insurat ni JOED SABIO SAJONIA)

NAPAGMITINGAN ITI CABULIG A MAKAILEPPAS TI TUNGGAL KAMENG TI DUA A BAG

Cabugao, Ilocos Sur (Nobiembre 3, 2011) – Nagmiting dagiti opisiales ken kameng ti CABULIG iti pagtaengan da Mayor Edgardo “Ediboy” S. Cobangbang, Jr. ken Mrs. Jerlie Seguban-Cobangbang iti Barangay Bonifacio, Cabugao, Ilocos Sur idi Nobiembre 2, 2011.

Kinalikaguman dagiti kameng a maaramid daytoy a miting kalpasan iti dua nga aldaw a seminar-workshop (Oktubre 29-30, 2011) a naangay iti Munisipio.

Imbatad  ni Dr. Margarita Santella-Jara, Adviser,  a makasapulda ti  150 a nagansilio a bag ket napagnunumuan a   maileppas agingga iti Disiembre 15, 2011. Napagkaykaysaan pay  a sagdudua ti aramiden dagiti nagatendar a bag ket ti CABULIG ti mangted ti gunggona dagiti gapuanan dagiti kameng.

“Ti makita a kalalanga  ti gapuananyo ket dayta ti pagibasaranmi iti mayalokar a pagpuonanyo,” imbaga ni Mayor Ediboy kadagiti nagmimiting.

Kayat  nga ipaawat ti Mayor a masapul a nausar, napidut, wenno resulta ti segregasion ti raw materials  a mausar  a selopin ket saan a praktikal no magatang lattan  iti sari-sari store ken tiendaan. Kanaig daytoy iti panggep ti Gobierno Munisipal, kalikaguman ti Mayor a   tunggal umili a makabael ket matignay koma  a mangaramid ti “segregasion”  ket katinnulongna    a mangilungalong  iti pannakaipatungpal ti pagannurotan  ti  Solid Waste Management.  

Ni Mrs. Teresita S. Gaspar, Level 2 Member ti CABULIG  kabayatan nga ipakitana dagiti gapuananna kalpasan iti pannakaaramid ti seminar idiay Munisipio.

Sakbayna, naiwayat ti Pre-evaluation ti DENR-Environment Management Bureau itay bulan ti Setiembre 2011 iti implementasion ti Solid Waste Management iti poblasion ti Cabugao  ket maangay ti Final Evaluation ita a bulan ti Nobiembre 2011, segun ken ni MENRO Edgar S. Balangatan.

Ti “advocacy”   ti CABULIG a pannakaaramat dagiti plastic waste a posible a  pagkakitaan dagiti inna ket maysa kadagiti napateg a tignay a mangidur-as ti implementasion ti Solid Waste Management.

Gapu itoy, assideg ti panagkikita ken panagmimiting dagiti kameng ti CABULIG tapno ma-evaluate ken marukod ti kabaelan ken gapuanan dagiti kameng babaen iti mairingpasda a proyekto  ket maisaruno manen dagiti “handicraft”  ken aktibidad a kayatda nga ipatungpal ken gun-oden.

Nakiragup  iti miting da  Mrs. Jerlie S. Cobangbang, President, Dr. Margarita Santella-Jara, Adviser,   Nag-SB Member Luciamar “Milou” Santella-Pano,    Mrs. Joenah G. Sevilleja ken  Mrs. Ester P.  Aguimbag manipud iti DA-LGU ken 27 a kameng ti CABULIG. # (Rinetrato ken insurat ni JOED SABIO SAJONIA)

Ni Mayor Ediboy a nangipakita iti ehemplo  ti bag a naaramid iti “nausar a selopin” manipud kadagiti kameng kabayatan a nakiragup kadagiti nagmimiting

Naragsak dagiti nagmimiting a nangsango ti pangngaldaw

TODOS LOS SANTOS, PIESTA DAGITI MINATAY NASELEBRARAN (Nobiembre 1-2)

Cabugao, Ilocos Sur – Apagngalay pay la  ti bulan ti Oktubre 2011, addan sumagmamano a nagsarungkar ti nitso ken nakaitaneman  dagiti minatayda tapno tarimnenda, dalusanda, papintasenda ken maisaganaanda ti idadateng dagiti dua a  kapatgan nga aldaw: Nobiembre 1-2.  

Iti Nobiembre 1, aldaw ti Martes, nagdudupudop dagiti umili ken taga-sabali a lugar nga adda minatayna iti Sementeryo ti ili a Cabugao. Agduduma ti makagapu a masapa ti dadduma a sumarungkar ngem kaaduanna  iti nalikudan a trabaho ken pagrebbenganda. Arigna awan ti itiitan iti sumrekan ti Sementerio  nangruna iti agsumbangir a puesto a paglakuan ti kandela ken makan iti karuay ti tao a sumrek-rummuar.

Umdas met nga oras  a nagbantay/nagrekurida  ti Kapolisan, BPATS (Barangay Tanod)  ken Public Safety Officers (Blue Boys) a nagtarabay ti tao/nagiwardas ti trapiko, Medics a buklen ti taga-DOH-RHU Cabugao a masagsagana nga agasistir no adda mapasamak nga  emerhensia.

Maanninagan ti iliw, segga ken im-imetenda a rikna  ti tunggal sumarungkar ket pamrayanda laengen nga aglalanglang/agsasarita  iti sakaanan, sidiran  wenno rabaw dagiti tanem tapno sadiwaenda ti lagip  dagiti namaris a paset ti biag dagiti pimmusayen a patpatgenda.

Iti biang ti Iglesia Filipina Independiente (IFI), inleppasda ti Misa ken  panagwaris ti bendision kadagiti minatayda  idi Nobiembre  1 ngem adda met latta nagsarungkar iti Nobiembre 2.     Inangay met ti Iglesia Romano Katoliko  ti Misa Kamposanto, Benneg ken Ruar iti Nobiembre 1. Naituloy iti Nobiembre 2, 2011 ket inangay ni Rev. Fr. Felicisimo  “Rudy”  Ferrer, Kura  Paroko,  ti  Misa Kamposanto (Uneg), iti3:00 P.M.  Kalpasanna, tunggal pamilia ket nangisagana ti bendita a pangwaris kadagiti minatayda.
Iti panagkiddaw ti kapanunotan maipapan     iti dadduma a  simmarungkar, naam-ammomi ni Nana Estrella Soliven, 71,   naibagana nga ulitegna daydi nalatak a Kolumnista ken The Star Publisher  Maximo V.  Soliven ti Sto. Domingo, Ilocos Sur. 

“Mamatiak nga agkikitayto met laeng kadagitoy nga ipatpategtayo inton panagungar,” natalged ni Nana Estrella a nangibaga. “Adda met gapuna a naaramidantayo  a nagbiag isu  ket a  kaikariantayo met ti maaddaan ti gundaway nga agbiag iti maikadua a gundaway…”

“Kasla matmaturogda, barok,” kuna ni Nana Marcela Saliganan, 73, “ngem ur-urayenda ti pannakaukomda ken uray met ketdi  kadatayo: adda mapan idiay Gloria a  kunada, adda met mapan idiay Impierno!”

Tunggal maysa, adda maibagana ket impabulonda ti amin a binalonda a rikna iti pananglagipda kadagiti minatayda tapno mabaw-asan iti barukongda ket ituloyda latta  iti  agbiag iti  normal a wagas. # (Insurat ni JOED SABIO SAJONIA)

PAGPAMPANUNOTAN:
ECCLESIASTES 3: 1-2 "To everything there is a season, a time for every purpose under heaven.
A time to be born, and a time to die…"

REVELATION 21: 4 “And God will wipe every tear  from  their eyes; there shall be no more death, nor sorrow, nor crying, There shall be no more pain, for the former things have passed away.” 

SKry NIGHT!

Cabugao, Ilocos Sur - Sinelebraran ti Sangguniang Kabataan Federation ti ili a Cabugao   babaen iti “Halloween Party  Presentations” iti pammasungad ti Todos Los Santos ken  Piesta Dagiti Minatay:  Nobiembre 1- 2, iti  karabiyan ti Oktubre 31, 2011.

CLICK HERE TO VIEW MORE PICTURES

Indauluan ni SK Federated President Benazir Sarmiento dagiti opisiales ti Pederasion ken dadduma pay nga SK Chairmen, Kagawad, LGU Personnel  ken miembros ti SK  iti nadumaduma a barangays a nagpartisipar kadaytoy nga okasion.

Makapaseggar ken makapakatawa dagiti nagakem iti agduduma a langa dagiti  pagbutbutngan ti ubbing ken uray  pay  dagiti nataengan a “di-katatawan” a tradision  ken  pammati ken paset ti  kultura ni Ilokano. Naurnos ken makaawis  ti  panangiparang dagiti nagakem kadagiti naipabuya ket naikkanda  pay ti gunggonada.

Nasangaili iti nasao a selebrasion ni Board Member Christian “Basi” Purisima ti Umuna a Distrito ti Probinsia ti Ilocos Sur ket iti inna panagmensahe,  kinablaawanna dagiti opisiales ti LGU-Cabugao nga idauluan ni Mayor Edgardo “Ediboy”  S. Cobangbang, Jr. ken kaduana ni ABC President, Rizal Brgy. 

Captain Teddy U. Soller iti dayta a rabii  a nangandingay kadagiti agtutubo ken umili a nagbuya.
Imbaga ni Bokal  “Basi” a sisasagana a makitinnulong a mangilungalong ti pagsaysayaatan dagiti agtutubo idiay laem ti Hunta Probinsial ket nangted ti P5,000 a pannakipasetna kadagiti agtutubo.
Iti sabali a bangir,  saan  met a  paudi  ni Congressman Ryan Luis V. Singson, First District, Ilocos Sur  no pakaseknan ti pannakaitag-ay ti “social development  activities”  dagiti agtutubo. Maysa a parang kadagiti adu a maitultulongna iti benneg ti agtutubo ket nangted met   ti P5,000 a pinakidanggayna kadagitoy iti SKry Night.

Panggep pay ti naangay a panagtataripnong a maysa kadagiti aktibidades  ti SK Federation a mamaginnasideg ti rikna ken  mangpabaro ti linnangen dagiti agtutubo iti ili ti Cabugao. #  (Insurat ni  JOED SABIO SAJONIA)