CANOPY TI MERKADO-PUBLIKO (NISTC), NAM-AY TI UMILI

Cabugao, Ilocos Sur – Naaramid ti Canopy ti Merkado Publiko (NISTC) babaen ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Segun ken ni Municipal Engineer Crescencio C. Formoso, agpaay ti canopy nga extension shed ti agsangpet ken rummuar a lugan ken makitienda (umili ken ganggannaet) ken impaay ti Gobierno Probinsial ti pundo a nausar iti pannakaaramid ti nasao a proyekto.

Kaaduan kadagiti traysikelan a kangrunaan ita a mangus-usar ken  agparparada nangruna iti lawlawasna ket   maipamaysada  iti imatangda nga agbirok ti iluganda  ken pagnam-ayan dagiti pasahero ta saanda a mainitan ken matuduan kabayatan a sumrekda ken rummuarda kadagiti pagtagilakuan iti uneg ti tiendaan.

Impagteng ti amin a mabenepisiaran kadaytoy  iti panagyamanda iti Gobierno Probinsial ken Munisipal iti nam-ayda a gubuayen daytoy a pasilidad iti pannakitiendada. # (Web In-Action)

SLOPE PROTECTION, NALPAS ITI BARANGAY PUG-OS

Cabugao, Ilocos Sur – Nairingpasen ti naaramid nga  slope protection iti igid ti baybay ti Barangay Pug-os, Cabugao, Ilocos Sur babaen iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Daytoy a proyekto ket naggapu  iti Local Government Support Fund (LGSF) iti Department of the Interior and Local Government (DILG).

Impeksa ti kaaduan nga agindeg iti asideg ti baybay ti panagyamanda iti Gobierno Munisipal iti naaramid a proteksionda  iti  napigsa a dalluyon  ken pannakakurukor  ti igid ti baybay. Iti pannaka-riprap ti igid ti baybay, kaaduanna ti nangibaga a bisita ken turista a nanayonan ti napintas a buya daytoy a disso nga asideg  ti Pug-os Beach kasta met  iti agtultuloy a coastal clean up-drive ti lumugar. # (Web In-Action)

SERBISIO MEDIKAL, INALDAW ITI RHU

Cabugao, Ilocos Sur – Kaaduan ita nga umili ti mapan agpaagas iti Cabugao Rural Health Unit (RHU)  ket dagiti ubbing, babbaket ken nataengan maigapu iti panateng ken uyek a gubuayen  ti  klima ita a bulan.
Imbatad ni Dr. Lotgarda “Loty” Tayao, Municipal Rural Health Physician,  a regular  ti serbisioda kadagiti umili ket panagpakonsulta ti maaramid manipud Lunes agingga iti Biernes. Aldaw ti Lunes-Martes ken Huebes ti Dental idinto ta  Martes ken Huebes ti Pre-Natal ken  maisamira met  a maedukaran dagiti inna maipapan iti Family Planning. Inaldaw latta met iti Pedia tapno maasikaso a dagus  ti pakaseknan dagiti  ubbing. Mapakaammuan met dagiti nataengan a saan pay a nabakunaan  ti Anti-Pneumonia tapno maikapet kadakuada daytoy a pannalaknib.
Imbatad  da Mrs. Janet Sison, RHU  Nurse ken  Mrs. Natividad Punla, RHU Midwife a  naikkanda ti mayannatup  nga agas dagiti nagpakonsulta.  Maikkan ti maseknan ti  reseta no nairana  a naibus ti suplay ti  partikular nga  agas. 
Ti agtultuloy a pannakaitandudo ti serbisio medikal ket paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para iti nasalun-at ken naprogreso nga umili ti Cabugao. # (Web In-Action)   

FINANCIAL ASSISTANCE PARA ITI RIC, NAITED

Cabugao, Ilocos Sur – Naiyawat ti Financial Assistance para iti Livelihood Projects ti Rural Improvement Club (RIC) iti 33 a barangays iti  Munisipalidad ti Cabugao ita nga Mayo 2, 2012 iti Rizal Park, Brgy. Rizal, Cabugao, Ilocos Sur  ken inimatangan  da SB Member  Vicky S. Serna, ABC President, Brgy. Captain Teddy U. Soller ken  Mrs. Joenah G. Sevilleja,  RIC Coordinator iti DA-LGU  nga aggatad ti Duapulo-Ribu a Pisos (P20,000) iti tunggal asosasion  manipud iti Gobierno Munisipal  nga idauluan ni Mayor Edgardo “Ediboy” S. Cobangbang, Jr. # (Web In-Action)

REGULAR MEETING TI ABC, NAANGAY

Cabugao, Ilocos Sur – Naangay ti Regular Meeting ti Association of Barangay Captains and Councils (ABC) iti Munisipalidad ti Cabugao  ita a Mayo 2, 2012 iti SB-ABC Hall, Cabugao, Ilocos Sur babaen ti panang-Preside ni ABC President, Brgy. Captain Teddy U. Soller.
Napateg a nataming  iti pannakaiwaras ti ganagan nga agpaay kadagiti mannalon inton Mayo 8, 2012 kasta met iti pakaseknan ti pannakaiyawat ti 33 a water pump generators kadagiti asosasion ti mannalon iti barangays. 

 
Nainayon   a naibinglay   kadagiti Kapitanes ti panangipakaammo ti COMELEC Registrar ti Munisipalidad ti Cabugao ti  eskediul ti panag-validate-da  ti botante  iti dadduma a barangays  ken pannakaited  ti Voters ID.

 
Nasayud  a napagsasaritaan ti amin a naidatag a   pakaseknan ti ABC  sakbay a nag-adjourn ti nasao a miting. # (Web In-Action)

TAEKWONDO CHAMPIONSHIP, 3 A BALITOK TI INYAWID TI CABUGAO

Cabugao, Ilocos Sur – Inyalat ti Cabugao Taekwondo Club iti 3 a balitok ken 4 a bronze a medalia iti naangay a 3rd DAGUPAN BANGUS FESTIVAL TAEKWONDO CHAMPIONSHIP a naangay idi Abril 14, 2012 iti Robinson’s Place, Calasiao. Pangasinan. 

Daytoy a pasalip ket nagpartisiparan ti 250 nga umaayam ti Taekwondo iti   amin a Gym’s ken Club’s  iti Region 1.

Imbatad ni Mr. Rommel Singson, Class Instructor, Cabugao Taekwondo Club, a determinado ti pananggun-od dagiti players-na kadagiti premio iti pakisalipanda  agsipud ta agtultuloy  ti suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti delegasionda.

Personal nga indanon  ni Mr. Singson ti  panagyamanna iti Opisina ni Mayor Ediboy. # (Web In-Action)

DAGITI PLAYERS KEN NAGUN-ODDA:

 Christopher  Sammuel Sivila, Gold      
Jamela Mae Paligutan, Gold      
Ronalyn Allado, Gold      
Aliyah Sandi, Bronze      
Nerious Tallusig, Bronze      
Nino Asignado, Bronze      
Christopher Elajah Sivila, Bronze      
Uriel Lazo, Semi-Finalist 

KALSADA KEN DRAINAGE, INTACT TI BRGY. BONIFACIO

Cabugao, Ilocos Sur – Naisaganaanen  ti idadateng ti umay a tudtudo iti pannakaaramid  ti covered canal iti Arcebal Street  ken pannakasimpa ti dadduma a kanal iti sidiran ti kalsada iti  Barangay Bonifacio, Cabugao, Ilocos Sur babaen ti panagtinnulong ti Gobierno Munisipal  nga idauluan ni Mayor Edgardo “Ediboy” S. Cobangbang, Jr. ken ti Sangguniang Barangay babaen ken ni  Brgy. Captain Valentin S. Tuyor, Jr. ti Barangay Bonifacio. 

Innayon ni Kapitan Jun Tuyor a naaramid pay   ti tampi ti sidiran ti kalsada (stoned lined canal)  iti abagatan ti barangay tapno saan nga agtawataw ti ayus no katudona ket maliklikan ti panagbunnong ti danum ken pannakalayus dagiti agnaed iti asideg ti kalsada ken  kasta met a   naikkan ti streetlights ditoy para kadagiti agdaliasat nangruna iti rabii.

Iti sabali a bangir, mabenepisiaran pay dagiti agdaldaliasat nga umili  iti nakongkreto a paset ti kalsada iti sumrekan iti Barangay Turod Patac iti amianan a daya ti Brgy. Bonifacio. Imbatad ni Kapitan Jun Tuyor  a daytoy ket inlungalong ti Gobierno Munisipal  iti  pannakasementona ken inikkan met ti Konseho ti Barangay iti streetlights a bagnos dagiti agdaliasat nangruna iti rabii. # (Web In-Action)