Cabugao, Ilocos Sur –
Nangayed ti naipaay a pannakabigbig
dagiti nagun-od ti BACALL Farmers Multipurpose Association a post-harvest
facilities iti naangay a programa iti Sitio Lusong Suyo, Barangay Baclig,
Cabugao, Ilocos Sur idi Disiembre 12, 2012.
Immuna a naangay ti
Nasantuan a Misa iti panangannong ni Rev. Fr. Sherwin Aquino iti Iglesia Romano
Katolika iti linong ti Palay Shed ken nabendisionan ti Flatbed Dryer sa naisaruno ti programa.
Kalpasan ti Invocation
ken National Anthem, pammasangbay a
sarita ti impaay ni Mr. Alberto Torreno, Miembro ti BACALL Farmers MPA.
Imbagian ni Mrs. Wilma
Ibea, DA Senior Agriculturist, ni OIC Regional Executive Director Valentino C. Perdido, Ph. D. ket dinayawna ti panangipateg dagiti
mannalon ken ti LGU kadagiti programa ti DA ket napintas unay ti ibungana a panagprogreso ti Agrikultura a
benneg ditoy a deppaar.
Imbagian ni SB Member Benedict M. Savellano, Committee
Chair on Agriculture ni Mayor Edgardo “Ediboy” S. Cobangbang, Jr. ket indanonna
ti napateg a mensahe ti Gobierno Munisipal ti Cabugao iti agtultuloy a
panangipaayna kadagiti napapateg a serbisio ken
tulong kadagiti mannalon ken iti sektor-agrikultura.
Impadamag ni SB Member Benedict nga iti Tawen 2013 ket adu ti manamnama a serbisio ken tulong a
maipaay kadagiti mannalon a maaprobaran ti gakatda iti Konseho Munisipal.
Inyarig met ni DA-LGU
OIC Nereo S. Daproza iti katibker ti landok “bakal” ti prinsipio, tunos ken
pinget dagiti kameng ti BACALL Farmers MPA ket agbalin koma a pagulidanan dagiti dadduma nga asosasion
dagitoy a gapuananda.
Kimmablaaw, binigbig
ken pinadayawan ni Provincial Agriculturist Teofilo R. Quintal iti napintas a panagkibin ti Gobierno Lokal ken
ti asosasion dagiti mannalon iti ili ti Cabugao a nakagun-odan dagitoy a
pasilidades. Dinakamat pay ti Opisial ti
DA Provincial a maysa ti ili ti Cabugao kadagiti napinget a mangsupsuporta kadagiti
programa ti DA a mapagballigianda met
iti Ahensia ken para iti nasapsapa a pannakagun-od ti “rice self-sufficiency”
ti Probinsia ken iti intero a Rehion Uno.
Kalpasan a maited ti
Certificate of Award manipud iti DA-RFU
1 ken ni Mr. Dominador Reynold Sabio, Presidente ti BACALL Farmers MPA,
impeksana ti nalaus a panagyamanna iti
LGU nga idauluan ni Mayor Ediboy ta nagballigida a nanggun-od kadagitoy a
pagnam-ayanda ken iti sapasap a makasapul iti barangayda gapu iti
panangyendorso ti Ama ti Ili.
Nagsarita met ni Mrs.
Joenah G. Sevilleja, destino nga Agricultural Technologist iti Barangay Baclig. Pinabilegna
dagiti asosasion ti mannalon a makikoordinar iti DA-LGU iti panangpasayaatda ti
asosasion ken panagtalonda.
Kamalman dayta a
petsa, naaramid ti Christmas 2012 Celebration ti asosasion iti naisibro a
Multi-purpose Drying Pavement-da iti Sitio Lusong Suyo ket naangay ti parlor games dagiti ubbing a nakaitedan ti
sagut ken premioda ken adda met salu-salo dagiti kameng nga idauluan ni
President D. Reynold Sabio. # (Web In-Action)
No comments:
Post a Comment