BACALL MPA, IPAMAYSANAN DAGITI POST-HARVEST FACILITIES

Cabugao, Ilocos Sur – Kalpasan a magun-od ti BACALL (Baclig-Callaguip-Lusong Suyo) Multipurpose Farmers Association dagiti makinaria kas iti Rice/Corn Thresher, Rice Cutter,  ken Robin Generator, ipampamaysana manen  ti pannakaadda dagiti Post-harvest Facilities babaen ti inisiatibada ken panangtarabay  kadakuada ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Naipatakderen  ti Farmers’ Shed-da, pasdek ti Flatbed Dryer,  ken Solar Dryer, agaassidegda a masarakan  iti Sitio Lusong Suyo, Barangay Baclig, Cabugao, Ilocos Sur nga usaren dagiti mannalon.

Iti pannaki-amad ti Web In-Action idi Disiembre 4, 2012, imbatad ni Mr. Dominador Reynold Sabio, BACALL MPA President a kayatda a gundawayan ti kaadda ti  Farm Mechanization Program ti DA ken Post-harvest Facility Program ti Ahensia babaen iti inisiatiba ti asosasion ken itutulong ti LGU-Cabugao.

Dagitoy a pagsayaatan ket dagiti miembros ken bumarangay  met laeng   ti mismo a mairanud, segun ken ni Presidente Sabio. Innayonna a natalged ti nakemna a mangibagnos kadagiti kamiembruanna nga agkiddaw/mangprobitsar ti serbisio dagiti makatulong ken maseknan nga Ahensia gapu iti panangkibin  ti LGU kadakuada  nga idauluan ni Mayor Ediboy.

Impeksa pay  ni Sabio ti nalaus a panagyamanna iti LGU-Cabugao, kadagiti kakaduana iti Pederasion, kamiembruanna ken iti DA-RFU 1 ket ikumitda met nga estimarenda a nasayaat dagitoy a pasilidades  ken makinaria a nagun-odda tapno ad-adu/sapasap  ti matulonganna ken nabaybayag met laeng iti usar dagitoy. # (Web In-Action)