Cabugao, Ilocos Sur – Saanen a mapengdan ti
panagprogreso ti Cabugao-Dayo gapu ta adda inisiatibo ti asosasion dagiti Cattle
Traders a kibkibinen ti LGU-Cabugao nga
idauluan ni Mayor Edgardo “Ediboy” S. Cobangbang, Jr.
Iti pannaki-amad ti Web In-Action idi Disiembre 15,
2012 a kaaldawan ti Dayo, imbatad ti kaaduan nga Opisiales ti Cabugao Cattle
Traders Association nga idauluan ni Mr. Marciano Raciles, Jr. a napigsa ti
nakemda nga agtultuloy ti progreso ti Cabugao-Dayo ta napintas ti agtultuloy a kammayet ti LGU kadagiti Opisiales ti Gobierno
Probinsial kas kada Gov. Luis “Chavit”
Singson ken Vice Gov. DV Savellano kasta metten iti Departamento ti Agrikultura
(DA) iti Probinsial ken Rehional a benneg.
Iti agdama, naaramiden ti singin a baro ken naestilo a pasdek iti dumna ti Dayo: pagopisinaan ti
Livestock Market ti Munisipio ken ti pagyanan dagiti mangimaton ti Dayo.
Napasimpa payen ti patad iti abagatan ti
Dayo a nayon a pagparkingan dagiti lugan ken pagaliwaksayan dagiti maki-Dayo.
Agtultuloy latta met a
nabun-as ken nabaneg dagiti nuang ken
baka a mai-Dayo iti kada aldaw ti Sabado. Kasta met a naridam dagiti Koridor a
mangannong ti transaksionda kadagiti aglako/aggatang ti ayup tapno sustenable latta ti panagoperar ti Dayo. # (Web Situational
Report)
No comments:
Post a Comment