Cabugao, Ilcocos Sur –
Naparegta dagiti agmulmula ti nateng iti Munisipalidad ti Cabugao babaen ti
pannakareorganisar ti asosasionda nga idauluan ita ni Mr. Armando Azcueta,
mabigbig a Vegetable Grower, ken iti pannakaiplano dagiti proyekto a
pagsayaatan dagiti kamkameng ken sapasap nga agnanateng babaen ti suporta ti Gobierno Munisipal nga
idauluan ni Mayor Edgardo “Ediboy” S. Cobangbang, Jr.
Inlungalong ni Mayor
Ediboy iti masnop a pagparadaan dagiti agibiahe ti nateng. Napili ti igid ti
National Highway iti masakbayan ti 2 Brothers Grocery no mapanka ti Manila ket
agtultuloy latta nga us-usaren dagiti mannalon a pagisadaan ti produktoda a
naisupot a nateng a kas iti sili
(Jaguar), taban, sandia ken dadduma pay a cash crops a pangnayon ti masapulan
dagiti agmulmula ti nateng.
“Nagpintas man a
gannuat daytoy ni Apo Mayor tapno adda masnop a pagyananmi ket no mapalawa
daytoy igid ti kalsada ket uray agparadanto ditoyen ti bus a pagikargaanmi,”
imbatad ni Mr. Rudring Sabugo, agmulmula ti sili a taga-Brgy. Salapasap,
maibilbilang a Vegetable Bowl ti Cabugao ken iti First District.
“Ala ket
maipagpannakelminton ti sektormi nga agnanateng ta suportadokami iti Munisipio. Agyamankami kadagiti
agrebbeng,” insupusop ni Mr. Pepito Sabugo, agiparparada met ti nateng.
Segun kadagiti
agkabsat, ipaluganda dagiti natengda iti bus ket addanto latta mangallawaten a
kaduada idiay Balintawak ket saandan a problema ti marketing-na. Adda pay met nateng a maibiahe para idiay Urdaneta, Pangasinan. #
(Web Situational Report)
No comments:
Post a Comment