Tuesday, December 18, 2012

CHRISTMAS PARTY TI BRGY. OFFICIALS, NAANGAY ITI CABUGAO COMPLEX


Cabugao, Ilocos Sur – Naangay ti Christmas Party dagiti Opisiales ti   33 a barangay ti Munisipalidad ti Cabugao nga idauluan ni ABC President,  Brgy. Captain Thaddeus  “Teddy”  U. Soller iti karabiyan ti Disiembre 17, 2012 iti sango ti pasdek ti  Cabugao Cultural and Sports Complex, Brgy. Rizal, Cabugao, Ilocos Sur.

Buklen dagiti nagpartisipar dagiti Brgy. Captains, Kagawad, Brgy. Secretaries & Treasurers, Brgy. Tanods/BPATS, Brgy. Nutrition Scholars (BNS) ken kameng ti Rural Improvement Club (RIC), Opisiales ken Personnel  ti LGU-Cabugao nga idauluan ni Mayor Edgardo “Ediboy” S. Cobangbang, Jr., Opisiales ti Gobierno Probinsial nga indauluan ni  Bokal Jeremias “Jerry” C. Singson, dadduma a VIP’s, Balikbayans, ken umili ti Cabugao.

Immuna a nagatendar dagiti Kapitanes ti barangay iti Simbang Gabi iti Simbaan Romano Katolika. Naluktan ti selebrasion babaen ti Ababa a Kararag a naidaton ken National Anthem. Impaay ni Brgy. Captain Teddy U. Soller ti pammasangbay a balikas.

Kangrunaan a nangpangayed ti panagrambak ti pannakipaset ni Nag-Diputado Ronald V. Singson ti First District, Ilocos Sur a nangipeksa ti nalaus a pannakailiwna kadagiti umili ti Cabugao ket nangipapaskua  ti P50,000 a gatad a pagpremio ken  nainayon iti ma-Raffle babaen  ti pannakabunot dagiti numero iti naminlima a rikus a sagsangapulo  a numero a nakaipaimaan ti   sag-P1,000 a premio iti tunggal nabunot a barangay official.

Kabayatan ti panaglak-am dagiti nagpartisipar kadagiti nabaknang a taraon a naisagana iti lamisaanda, maibalballaet ti panagbunotda ti numero kalpasan ti maaramid a panagbitla, panagkanta ti banda. Nagpabuya pay ni Sir Joseph Simpo the Magician iti makapatengngel-anges a laingna iti Magic. Daytoy a pabuya ket pangparagsak met iti selebrasion manipud ken ni Konsehal Carlos V. Sison.

Immuna a nangted ti  Mensahena  ti Paskua ni Mayor Ediboy ket kimmablaaw ken nagyaman  kadaytoy a tinawen a  panagtitipon dagiti  barangay officials a mangselebrar ti Paskua. Impeksa ti Ama ti Ili ti ragsak ken ayatna a  makipagrambak  kadakuada kasta met ti kaadda  dagiti natatakneng a bisita a nakidanggay a  nangpadaeg pay ti panagselebrar. Innayon ti Alkalde Munisipal a kaduana ti Pamiliana a mangipeksa ti nabara a kablaaw para iti sapasap iti Naragsak ken Narambak a Paskua ken Nagasat ken Nabunga a Baro a Tawen ti amin.

Impeksa met ni Hon. Ronald V. Singson ti iliwna kadagiti umili nangruna kadagiti opisiliales ti barangay. Paset ti ayatna ti na ikumitna a bisitaennanto ti tunggal barangay ta ammuenna ti kasapulanda tapno itedna dagitoy. Impadamag pay  ti dati a Congressman a manamnama  kadagiti  barangay ti pakabuklan ti tulong a maited kadakuada. Nangiburay  ti  P50,000 a mainayon a pagpremio ken  pangparagsak kadagiti naitallaong babaen ti Raffle.

Iti espiritu ti Paskua, nangted met ti pang-aginaldoda   a  mai-raffle a gatad da Bokal Jeremias “Jerry”  Singson, Vice Gov. DV Savellano, Hon. DJ Savellano  ken Balikbayan Dante Yasay  iti sag-P10,000-da idinto ta sag-P5,000 met  manipud kada SB Member Carlos V. Sison,  SB Member Josefina S. Vallejo ken SB Member Benedict M. Savellano.  

Nangipapaskua met da Mayor Ediboy,  Vice Mayor Danny Q. Gazmen,  Sinait Ex-Mayor Edgar Yabes, Atty. Rex S. Morales, Atty. Randy B. Kinaud ken Brgy. Captain Rogelio Siruno iti pannakabiangda a nainayon a pagpremio ti raffle  a nangpagagar pay kadagiti nagatendar iti panagrambak ti Paskua.

Kanaig daytoy, in-kind ti impapaskua  ni SB Member Vicky S. Serna idinto ta lusob met ken ni  Brgy. Captain Inocencio S. Sadac iti pannakabiangda iti nainayon  pay a pagpremio ken  nangparagsak iti selebrasion babaen iti Raffle.

Naited  pay kadagiti Opisiales ti barangay dagiti   nabungon a sagut a naggapu iti Liga-da iti selebrasion ti Paskua 2012. 

Nagpaay nga Emcee ti programa ni Brgy. Captain Arnold V. Yangat.  # (Web In-Action)


No comments:

Post a Comment