CONG. RYAN KEN MAYOR EDIBOY, NAAWISDA ITI CISTODAI X’MAS PARTY

Cabugao, Ilocos Sur – Naaramid ti umuna a Christmas Party dagiti  kameng ti Cabugao, Ilocos Sur Tricycle Operators and  Drivers Association, Inc. (CISTODAI) idi Disiembre 15, 2012 iti Cabugao Cultural and Sports Complex, Brgy. Rizal, Cabugao, Ilocos Sur.

Nasangaili iti nasao nga okasion ni Congressman Ryan Luis V. Singson, First District, Ilocos Sur agraman dagiti  kakaduana ken indauluan met ni Mayor Edgardo “Ediboy” S. Cobangbang, Jr. dagiti Opisiales ti Gobierno Munisipal a timmalantan iti nasao a panagselebrar dagiti traysikelan iti Paskua 2012.

Kimmablaaw ni Mayor Ediboy ket napnuan kaipapanan ti pammigbigna iti kinadisiplinan dagiti traysikelan ket imbilangna a makatulongda  met iti panagdur-as ti ili dagitoy a pannakigamulo ti transport sector gapu ta nakasapulan met ti serbisioda iti aktibo a panaggunay ti tao tapno ad-adu ti magapuananda a mangibunga ti pagsayaatan ti sapasap ken ti kinadisiplinada nga agmaneho a mangpaannayas ti trapiko ken ti seguridad ti pasaherosda  iti inaldaw.

Binigbig pay ti Ama ti Ili iti impapaskua  ni Hon. Constante Oandasan ken  panangdayawna  iti CISTODAI ket pinagyamananna pay  ti panangdaydayaw dagiti taga-kabangibang nga ili iti kinatunos ken kinadisiplina dagiti traysikelan iti   ili  ti  Cabugao.

Pinadayawan met ni Diputado Ryan Luis V. Singson iti napnuan ayat nga awis dagiti traysikelan a nagatendar ti umuna a  Christmas Party-da. Nagyaman ni Congressman Ryan iti panangipateg ti CISTODAI ken dagiti umili ti Cabugao  kenkuana kas met iti ar-aramiden  dagiti nadumaduma a  sektor ken umili  iti Probinsia ti Ilocos Sur.

Naaramid ti raffle draw  ti asosasion a nakaitedan dagiti nagduduma a premio a kas iti sumaganad: 1^st Prize-I cavan rice; 2^nd Prize - 1 unit Electric Fan; 3^rd Prize -  1 unit 2 burner stove; 4rth Prize-Exterior; kasta met a 5 a Consolation Winners iti Oil ken 10 Winners ti Groceries.

Gapu iti espiritu ti Paskua, nangipaay ni Mayor Ediboy iti 50 a T-Shirts, 5  winning numbers a libre ken bayadanna  ti prangkisana a traysikelan iti Tawen 2013 gapu iti tulnog dagitoy a mangannong ti pagrebbenganda iti Munisipio, ken 10 a winning numbers a katukad ti Boundary income a sag-P200 ti maysa.

Nangipapaskua met ni SB Member Carlos V. Sison ti 15 a nabunot a numero a pinaskuaanna ti sag-P200 kasta met a nagpapaskua ni ABC President Brgy. Captain Teddy U. Soller ti 10 a winning number a nabunot a sag-P200 ti maysa.

Nagpapaskua met ni Congressman Ryan iti P5,000 ken maysa a sako a bagas iti asosasion kasta met iti nabaknang a sagana a sinagrap ti sapasap.

Tapno maapresiar met ti espiritu ti Paskua ti CISTODAI, nagpapaskua met iti 2 litro a gasolina  iti nabunot a lima a numero kadagiti miembros.

Nangtedda met  ti saggaysa  a   Mensaheda  ti Paskua da Sinait Former Mayor Edgar Yabes, Vice Mayor Danny Q. Gazmen, SB Member Benedict M. Savellano, SB Member Carlos V. Sison, Atty. Rex Augustus S. Morales, Hon. DJ Savellano ken Brgy. Captain Inocencio S. Sadac.

Closing Remarks ti impaay ni Vice President Elmer Valenton ti CISTODAI. Pinagyamananna iti  babaen ti asosasionda kadagiti aginaldo a nagun-odda a traysikelan kadagiti bisitada ken nagyaman iti amin a nakipaset   iti naballigi a panagselebrarda ti Paskua 2012.