GRADUATION TI 29 FARMERS ITI FFS-GARLIC, NAGTENGAN

Cabugao, Ilocos Sur – Kalpasan ti naballigi a 16 weeks a panagbasada iti Teoria ken Actual iti panagpatanor ti nakalidad a  bawang, nadanon ti panagturpos dagiti 29 a Farmer-Trainees iti Season-Long Field School on IPM for Garlic Production idi Pebrero 20, 2013 iti Barangay Pug-os, Cabugao, Ilocos Sur.

Imbagian ni Kagawad Alfredo Leano dagiti Opisiales ti Barangay Pug-os a nangpasangbay kadagiti nagturpos,   Opisiales  ken  bisitas  iti panaglukat ti programa.

Iti Opening Remarks, pinadayawan ni Municipal Agriculturist Zenaida S. Andrada dagiti nagturpos ta maibilangdan a Farmer Extension Workers a mangtun-oy ti food security and sufficiency iti kagimongan. Pinagyamanan  pay ni MA Andrada ti LGU Cabugao nga idauluan ni Mayor Edgardo “Ediboy” S. Cobangbang, Jr. a nangilungalong kadagiti FFS Programs a naaramid  iti Brgy. Pug-os.
Imparang ni Mr. Henry Saliganan ti Presentation of Output.

Nangipaay ti Inspirational Message  ni Mayor Ediboy. Kimmablaaw ken  nagyaman iti nagun-od dagiti mannalon a nagturpos a  balligi. Imbinsa ti Ama ti ili ti 3 a kapatgan a maragpatda: 1. Adu a maapit 2. Nakalidad a  maapit 3.  Nadardaras, agtitinnulong ken agkokomplementar ti serbisio dagiti ahensia para kadakuada.
Innayon ti Hepe Ehekutibo ti Ili a no dumakkel ti apit, pumigsa ti “purchasing power” dagiti  mannalon ket pumigsa met ti ekonomia ti ili. Awan ti rason a di maisangpet ti programa para iti mannalon ket no matulonganda ti bagida, dagiti umili ti aggin-awa, ti umili ti tulbek ti balligida met laeng.

Nangipaay met ti impressions da Mr. Roberto Sablay, Mr. Benjamin Saquiton, ken Mr. Johnny Salarzon, agpapada nga FFS Participants. Pammigbig, panagdayaw ken panagyaman dagiti imbagada. Dakkel ti maitulong ti inadalda iti panagmulmulada, segun pay kadakuada.

Pinadayawan met ni Miss Editha Castillo, Assistant Provincial Agriculturist/Provincial HVCDP Coordinator iti naballigi a gapuanan dagiti mannalon ti Cabugao. Binigbigna ti napintas a panagkibin ti asosasion ti mannalon ken ti Gobierno Munisipal a mangsupsuportar  kadagiti programa ti DA a maipapaay kadagiti mannalon.

Balligi ken pannakanayon ti programa nangruna iti Organic Agriculture ti kaipapanan ti panagsarita ni Provincial Agriculturist Teofilo R.  Quintal. Awanen  ti pagkunaanna  ti natun-oyan dagiti mannalon ti Cabugao pakaseknan ti Teknolohia, Farm Mechanization ken Subsidies a maipapaay kadakuada. Ti pannakaitandudo ti pagay ken cash crops babaen ti organiko a wagas ti indariragna  a  mainayon a ragpatenda.

Mayataday met ti bugas ti Mensahe ni SB Member Benedict M. Savellano, Committee Chair on Agriculture a panangsuporta dagiti mannalon iti Soil Fertility Mapping Project of Cabugao a maar-aramid iti kada barangay. Innayonna a maragpat ti programa ti dakdakkel a masapulan ni mannalon babaen ti pannakaibaba ti magastos iti kasapulan ti panagmula no maipakatton ti resulta ti soil analysis iti amin a pagmulmulaan iti ili.

Nangipaay ti intermission number dagiti nagturpos.

Confirmation of Graduates ti binagi ni Ms. Salvacion Santiago, pannakabagi ti Philrice-IPM CRSP,  Munoz Science City, Nueva Ecija.

Indauluan ni PA Teofilo R.  Quintal dagiti Opisiales ti nagkakammayet nga ahensia a nangibunong ti Certificates kadagiti nagturpos.

Nakipaset iti Graduation Exercises da SBM Vicky S. Serna, SBM Josefina S. Vallejo ken SBM Carlos V. Sison.

Nag-Emcee ni Mrs. Joenah G. Sevilleja, AT-DA LGU.

Iti Closing Remarks ni Mr. Elmer G. Bromeo, FA Federated President, pinagyamananna iti amin a nakigamulo iti proyekto ken  iti naballigi a nagbanagan ti programa. # (Web In-Action)