Naluktan ti programa babaen ti Invocation nga indauluan ni Ms. Elsie Suero Escueta, impatayab ti banda ti Philippine National Anthem, Cabugao Hymn ken CI March iti panangidaulo ni Mr. Romeo Solar, Assistant Principal. Iti Words of Welcome ni Director (Ret.) Judge Efren S. Ubungen, imbinsana ti pateg ti panagtitipon ket gubuayen iti sinninged ni ayat ken panagtitinnulong.
Kalpasan ti nagsaruno nga intermission numbers ti Selected CI Students ken CI Faculty & Staff, nangipaay ti Keynote Address ni Mayor Edgardo “Ediboy” S. Cobangbang, Jr. Kimmablaaw ken nagyaman ni Mayor Ediboy iti natibker a panagtitimpuyog dagiti alumni, nagannak ken estudiante iti tinawen a panangesponsor dagiti batches iti anibersario ti pannakaipasdek ti Cabugao Institute. Binigbigna pay dagiti gagarda nga agsubli iti ilida a Cabugao a makiinniliw, mangkita ken mangpairut ti linnangen ken mangipaay iti mabalinda nga itulong iti naggapuanda a pagadalan.
Insupusop ti Ama ti Ili a dagitoy nga agtultuloy a tagipatgen a galad ti Cabugaoenios ket saan a magatadan ti pategda ken maipaay a pagwadan ti sapasap ken iti sumarsaruno a henerasion iti dumurdur-as nga ili ti Cabugao.
Kalpasan ti pabuya dagiti kameng ti Parent-Guardians Association (PGA), impresentar ni Assistant Principal Romeo Solar dagiti partisipantes ti Class 1988 a ditoy a pakaibilanganen ni Mayor Ediboy. Naisaganad ti Turnover ti CI Banner kadagiti pannakabagi ti Class 1989 a sumaruno nga agesponsor.
Inyam-ammo ni Mr. Dennis Abara, Alumnus Class 1988 ti Speaker iti Class 1988 nga isu ni Forester Jimson Solatre. Panangiburay ti padas, pateg ti kinaklase ken ti Alma Mater (eskuela CI) ti anag ti mensahena.
Impresentar met ken inyam-ammo ni Dr. Augusto Sumalde dagiti Alumni ken Speaker ti Class 1973 a ni Ms. Lorna Cobangbang-Tejada kalpasan ti Turnover ti CI Banner iti Class 1974. Panagballigi iti propesion ken panagbaniaga, panangtaliaw ti nagadalan ken panangtaginayon ti panaglalangen ti bugas ti mensahe ni Ms. Tejada.
Dagiti Emcee: Mrs. Josie Santella-Callanta ken Engr. Charlie Concepcion ti nangiyam-ammo ken ni Mr. Esmeraldo Pascua, Speaker ti Class 1963. Panagballigi dagiti annak, pateg ti nagadalan ken panagkakadua ti anag ti panagsarita ni Mr. Pascua. Nayallawat ti CI Banner iti Class 1964 a sumarunonto nga agesposor.
Nagsarita ni Dr. Diocaesar S. Suero, CIAA President. Naited dagiti Certificate of Recognition kadagiti Host Classes: 1963, 1973 ken 1988 babaen kada Director Efren S. Ubungen ken Miss Maria S. Rondon, Principal.
Napnuan kaipapanan iti pannakaitandudo ti pageskuelaan ti Cabugao Institute iti kaibatogan ti Closing Remarks nga impaay ni Miss Maria S. Rondon, Principal. # (Web In-Action)
No comments:
Post a Comment