LIVESTOCK SECTOR, AGTULTULOY A MAPOKUSAN

Cabugao, Ilocos Sur – Iti pannaki-amad ti Web In-Action iti Pebrero 8, 2013, imbatad ni Dr. Melvin Castro, DVM/Municipal Livestock Coordinator nga agtultuloy ti madagdagus a pannakaidanon ti serbisio ti Beterinario kadagiti agsakit nga ayup ken dinguen a maipakaammo iti Opisina ti Municipal Agriculture Office ti ili. Agtultuloy latta met ti pannakabakuna dagiti aso iti Anti-rabies  ken ayup ken dinguen iti   pangkontra ti sakit. Malaksid iti naka-eskediul a Markasion kadagiti urbon nga animales  babaen iti Taga-Munisipio, maipamaysa pay ti pannakaasikaso ti papeles iti maaramid a transaksion iti Cabugao Dayo iti tunggal aldaw ti  Sabado.

Insupusop ni Dr. Castro nga ingunamgunamna kadagiti lumugar iti  barangay a pappapananna a pagtalinaedenda  koma a nadalus dagiti panganan ken bagi dagiti ayup ken dinguen tapno malapdan ti itataud ti sakit. Kasta met koma a maipaayan ti natalged a pagaponan/pagyanan dagiti ayup ken dinguen ken masalaknibanda  iti nakaro a pudot ken lamiis wenno pannakababasa. Iti panagasikaso iti Livestock Sector, kidkiddawenna pay  iti pannakitunos koma dagiti mannalon a mangsabat kadagiti programa ti Munisipio iti panangpasayaat ti industria ti animales iti Munisipalidad.

Kanaig itoy, innayon ni Dr. Castro nga umabot  ti 7 a Puro a  Buffalo ti  napatanor babaen iti programa ti DA-LGU nga Artificial  Insemination iti  4  a barangay ti ili iti 2012. Kasta met a nairekord iti 155 a nagiparehistro a tattao iti Certificate of Ownership iti animalesda kasta met iti 392 a Transferred Certificate of Ownership a mannalon iti ayupda  manipud Hunio 2012 agingga iti Disiembre 2012.   # (Web Situational Report)