Wednesday, February 6, 2013

SOIL FERTILITY MAPPING, NAILUNSAD DITOY CABUGAO

Cabugao, Ilocos Sur – Nailunsad ti Launching-Briefing Orientation on Soil Fertility Mapping ditoy ili ti Cabugao, Ilocos Sur  idi Pebrero 5, 2013 a nagpartisiparan dagiti Brgy. Captains, Kagawad (Committee Chair on Agriculture), Pangulo ti Farmer’s Associations,  LGU Officials and  Employees ken dadduma pay  a dinanon dagiti Opisiales ti Bureau of Soils and Water Management (BSWM), Manila  iti Cabugao Cultural and Sports Complex, Brgy. Rizal, Cabugao, Ilocos Sur.

Immuna a naaramid ti pannakaangay  ti   programa. Welcome Message ti impaay ni Municipal Agriculturist Zenaida S. Andrada. Inallukoyna ti amin a nagpartisipar ti panangimutektekda iti maibinglay kadakuada nga adal iti pannakaamiris  ti daga a pagmulmulaan iti barangayda  ken maibaga  iti umno ken kaadu ti ganagan a mausar iti panagmulada. Pinagyamananna iti LGU Cabugao iti panangidaulo da  Mayor Edgardo “Ediboy” S. Cobangbang, Jr. ken Vice Mayor Danny Q. Gazmen a mangimaton  iti Konseho Munisipal ken iti panangitandudo ni SB Member Benedict M. Savellano, Committee Chair on Agriculture ta makaunan ti Cabugao a mangaramid ti kastoy a proyekto.


Binagi ni SB Member Benedict M. Savellano ti Introduction of the Project. Bininsana ti pateg daytoy a proyekto nga indarirag ni Mayor Ediboy tapno naan-anay a matarabay dagiti mannalon malaksid iti kaadda kadakuadan dagiti amin a kasapulan ti naballigi a  mausar iti produksion.



Pinagyamananna dagiti opisiales ti Bureau of Soils and Water Management (BSWM) nga idauluan ni  Assistant Director Wilfredo E. Cabezon ta naaprobaran ti kiddawda iti kabiitan ket inikkan met ni Mayor Ediboy ti importansia iti pagkasapulan ti proyekto tapno maipatungpal  a madagdagus.
Iti Overview of the Project, imbatad ni Assistant Director Cabezon nga umuna daytoy a proyekto a mapasamak iti Ilocos Sur. Dinayawna ti naan-anay a suporta ti LGU iti Sektor-Agrikultura ditoy gapu ta ibaklayna ti gastos idinto ta Teknikal a tulong ti aggapu kadakuada.  Naurnos pay  ti panangibinsana ti programa ti BSWM maipapan iti soil analysis. Inrekomendana pay ti  Soil  Mobile Clinic ken Expanded Modern Rapid Composting a mabalin a gun-oden  ti LGU a mangsuplementar ti Soil Fertility Mapping tapno nadaras a maammuan ti resulta. Insupusopna a babaen ti Integrated Nutrient Management, magun-od ti Food Stable Proficiency Level ken nakalidad a panagbiag ti sapasap   a  kayat a gun-oden ti DA ken ti Gobierno Nasional.


Nangipaay met ti Message ni Congressman Ryan Luis V. Singson a dimmar-ay iti Programa. Dinayawna ta ditoy manen Cabugao ti pakaipakatan daytoy a programa a mabalin a tuladen ti sabali nga ili ti probinsia. Dinakamatna ti pateg ti pannakaamiris ti maitutop a pangpasayaat ti anag  ti daga a pagmulaan. Innayon ti Diputado nga iti pannakabuangay ti napipintas a programa  ni Mayor Ediboy kadagiti mannalon  iti rason a dumurdur-as ti ili a Cabugao.


Kimmablaaw ken nagyaman met ni Mayor Ediboy iti mensahena. Imbatad ti Alkalde Munisipal nga iti 83 Porsiento a mayoridad ti mannalon ti ili ket saanto a mapupuotan ti nakalaglag-an a kasasaad ti panagbiag dagiti umili gapu iti nakalidad nga apit ken kaadu ti paglakuanda. Insupusopna a naikari iti batangda a tumulong kadagiti mannalon ket impeksana ti pannakaadda ni Diputado Ryan a sanggirda ta aglaplapusanan ti pundo a maited para iti proyekto ditoy Cabugao. Innayon ti Ama ti Ili nga amin a naited a pundo ket adda resultanan  ket daytoy manen  a proyekto ket maiserbi iti umili nga awan ti maidumduma ket marikna ti kaaduan ti resultana iti kabiitan a tiempo.



Nagsarita met da Mr. Dominciano Ramos, Division Chief, Soil Survey ken Ms. Eugene Briones, Team Leader, Soil Fertility Mapping. Inlawlawagda ti naan-anay a pakabuklan ken pannakaipatungpal ti proyekto iti daga ken iti barangay.


Kamalman dayta a petsa, naangay ti Briefing iti Barangay Hall ti Barangay Baclig ket naipakat ti wagas ti panagala ti soil samples iti kataltalonan ti barangay iti  imatang dagiti partisipantes ken tinarabay ida da Ms. Eugene Briones, Team  Leader, Mr. Jun Jogno, GPS Application, Soil Fertility Mapping of Cabugao kasta met ni SB Member Benedict M. Savellano. Kalpasanna, nagsubli ti grupo iti SB-ABC Hall ket nangmiting da Ms. Briones ken SB Member Savellano kadagiti pannakabagi ti DA-LGU Staff para iti sumaruno nga itrabahoda a barangay  kadaytoy a proyekto ti LGU Cabugao ken BSWM-Manila. # (Web In-Action)


No comments:

Post a Comment