ALL SAINTS’ DAY 2015, SAPASAP A NAGSELEBRARDA ITI NOBIEMBRE 1

Cabugao, Ilocos Sur – Nagselebrar ti sapasap nga adda minatayna kadagiti kadakkelan a  kamposanto (Kamposanto Katolika ken Kamposanto Aglipayano) idi Nobiembre 1, 2015 babaen ti panagatendarda iti Nasantuan a Misa a naidaton kadagiti minatay iti Kamposanto Ruar babaen iti panangannong ni Rev. Fr. Felix Costales, Kura Paroko ti Iglesia Romano Katolika, Cabugao, Ilocos Sur.

Rinambakan ti Cabugao Catholic Church ti Rambak Fiesta dagiti Sasantos ken Minminatay babaen iti Tema: “Ipaduyakyak Pammati iti Panagungar ken Biag nga Ananayon ken ni Kristo Jesus.”

Sakbayna, naangay pay ti tallo a Misa iti Simbaan Romano Katolika   manipud iti 4:30 am agingga iti 8:30 am.

Idi Oktubre 31, 2015, naangay ti Misa Kamposanto idiay Barangay Sisim babaen ti panangannong ni Rev. Fr. Angelito de Gracia.

Kabayatanna, umarngi met laeng ti naaramid iti Kamposanto ti Iglesia Filipina Independiente babaen iti panangannong ni Rev. Fr. Joseph Badua, Kura Paroko.

Kanaig daytoy, nagasikaso ti Kapolisan (Municipal Police Station) a  nagtarabay ken  nagiwardas iti naannayas a  trapiko iti batog  ti kamposanto (Cabugao Public Cemetery)  a sumrekan ken rummuaran ti tao a kaduada dagiti Barangay Tanod (BPATS), MDRRMC-Wasar;  Security Personnel  ti LGU, Medics iti RHU-Cabugao ken ti BFP (Cabugao Fire Station). Nakipaset met dagiti kameng ti Cabugao Elite Riders Club.  Adda met latta a naidestino a Security Personnel  iti uneg ti sementerio kabayatan nga umad-adu ti sumarungkar a tattao. (Web Situational Report)