Cabugao, Ilocos Sur – Dimmar-ay ni Mayor Edgardo “Ediboy” S. Cobangbang, Jr. iti miting ti Federated Senior Citizens ti ili a Cabugao, Ilocos Sur idi Nobiembre 17, 2015 iti Senior Citizen’s Center, Brgy. Rizal, Cabugao, Ilocos Sur.
Iti nasao a miting, kimmablaaw ti Alkalde kadagiti agkasangay a nataengan ken iti aktibo ken agtultuloy a partisipasion dagiti nataengan kadagiti programa ken aktibidades iti Munisipio a mangpapintas pay iti pannakilangenda iti komunidad-da ken ti ilida.
Imbatad pay ti Hepe Ehekutibo a karaman met latta dagiti nataengan iti nakaigapuan ti panangabak ti LGU-Cabugao a nangyalat iti kakaisuna a pammadayaw iti Seal of Good Governance nga ited ti DILG iti maysa a 1st Class nga LGU iti intero nga Ilocos Sur. Insupusopna nga agtultuloy koma a tuntonen dagiti Senior Citizen dagiti kaikarianda a pagimbagan ken proyekto ken sabsabali pay a pribilehio a maited kadakuada agsipud ta dagiti sumarsarunto met nga ag-Senior Citizen iti agsagrap kadagitoy a pagsayaatan.Innayon ni Mayor Ediboy nga iti pannakilangenna kadagiti nataengan ket adu ti mapanunotna ken kayatna a mapaadda ngem agan-anusda laeng ta pursigido met ti Munisipio a mangileppas kadagiti masirsirmatada a proyekto a kas iti pannakaipalawa ti Senior Citizen Center ken ti pannakapaadda ti recreational area dagiti nataengan.
Iti pakaseknan ti asosasionda, impeksa ti Alkalde ti pannakitinnulongna iti liderato ti Federated Senior Citizen a mangipatungpal kadagiti aktibidad ken proyektoda a nataengan. Inkumit ti Ama ti Ili iti pannakikaysana kadakuada inton Disiembre 15, 2015 a Christmas Program ti Pederasion ti nataengan ket esponsorandanto dagiti pa-raffle a mangparagsak iti daytoy a panagtitiponda.Kiniddaw pay ni Mayor Ediboy a mangesponsor koma ti Federated Senior Citizens iti maysa a Resolusion a mangkiddaw iti panagopisina ditoy Cabugao dagiti pannakabagi ti Philhealth tapno manam-ayan dagiti nataengan a mangiproseso kadagiti papelesda no sagrapenda daytoy a pribilehioda.
No comments:
Post a Comment