Cabugao, Ilocos Sur – Naangay ti 2015 District Science Quest babaen iti Tema: “Philippines: A Science Nation Innovating for Global Competitiveness” itay nabiit iti Cabugao Cultural and Sports Complex, Brgy. Rizal, Cabugao, Ilocos Sur.
Iti Part 1, naangay ti Registration of Participants.
Naangay met ti ababa a programa iti nasao a pagadalan a nagatendaran dagiti Science Teachers ken Clubbers nga ub-ubbing a naggapu iti intero a 26 a pagadalan ti Cabugao DepED District.
Kalpasan ti Prayer ken pannakakanta ti National Anthem ken Cabugao Hymn, nag-Welcome Talk ni Mrs. Estrellita M. Siruno, School Principal II, CNCS ket nagyaman ta maipatungpal daytoy nga aktibidad a mangipaay ti sirib iti pakaseknan ti siensia kadagiti ubbing ken iti aglawlaw.
Kalpasan ti Intermission Number ti CNCS ROYSC, naipresentar dagiti Opisiales ti ROYSC ken ROSCA ket pinagsapata ida ni Mrs. Estrellita M. Siruno, Principal II.
Naisaganad met ti panangipaay ti Mensahe ni SBM Dr. Jemaima S. Tan-Yee, Committee Chairman on Education. Kimmablaaw ken nagyaman ta adda dagiti ubbing nga agduyos iti siensia. Pinadayawanna ti kinaregta dagiti mangisursuro, nagannak ken Guardian a mangtartarabay kadagitoy tumantanor ti siribna iti Siensia nga ub-ubbing. Innayon ti Konsehala a napateg daytoy a pagsiriban a maipasagepsep iti naganus a panunotda ta iti siensia ket maysa a napateg a ramen ti panagbiag ti tao ken iti kagimongan a paggargarawanda. Kuna ti Konsehala a makikaysa isuna ken ti Gobierno Munisipal iti Sektor-Edukasion iti agtultuloy a gannuat a mangipromot ti pannakapadur-as ti kabaelan ken pagduyosan dagiti ubbing babaen iti Siensia kas ipaganetget ti Tema: “Philippines: A Science Nation Innovating for Global Competitiveness ”.
Kalpasan ti Intermission Number ti District ROSCA Officers, nangited ti Orientation ni Mrs. Evangeline U. Seatriz, District Science ROSCA President.
Simmaruno ti Contest Proper iti walo a naisagana a mapagsasalipan: Science Quiz; Techno Quiz; Environmental Quiz; Collage/Scrap Art Contest/Investigatory Project; Sci- Essay; Sci-Dama (Water and Power Patrol).
Kabayatanna, iti Teachers Category, naaramid ti Strategic Intervention Material (SIM) Grade III to VI ken Investigatory Project – Applied and Life (Individual & Team)
Naaramid ti Coronation Rites iti Part IV ti programa.
Nakoronaan da Mr. Science 2015 – Gabriel Caesar Sumibcay ken ni Miss Science 2015 Princess Marielle G. Roque; naikkan met ti Sash, Coronet ken Trophy ti innem a runner-up babaen kadagiti nadutokan ken nagannak kasta metten a naikkan ti Sash iti 18 nga agparis iti babaenda a kandidata. # (Web In-Action)
No comments:
Post a Comment