Tuesday, November 10, 2015

PAMILYA, KASAPULAN TAPNO AGTALINAED TI NAPINTAS A SALUN-AT

Ti pamilya ti kangrunaan nga instrumento tapno agtalinaed ti napintas a salun-at ti maysa a tao, kuna ti Provincial Health Office.

Dakkel ti trabaho ti pamilia a mangmantener ti salun-at dagiti kamengna, impalagip ni Jeffrey Pablico ti mangibagi ti panannakaiyadal ti salun-at (health educatinon) iti PHO. Pagrebbenganda ti mangipalagip ti nasalun-at a panagbiag babaen ti regular a pammagbaga ken panangidaulo ti kastoy a biag. Iduronda ti pannangan ti husto.

Gapu ta agkakabbalay wenno naasidegda iti tunggal maysa, agbalinda a kapintasan a modelo ken mangisursuro, kasta met manghusgar ti estilo ti biag kada aldaw a panagbiag.

Imballaag ni Pablico a no agpalya ti pamilia a mangaramid ti pagrebbenganna a mangtulong kadagiti kamengna nga agbalin a nasalun-at, sumrek dagiti saksakit iti pagtaengan.

Isu nga iti panagpaspassiar ti PHO kadagiti 34 nga ili ken siudad ti probinsia, iyad-adalda kadagiti agindeg ti pagrebbengan ti kada kameng ti pamilia a tumulong iti panagtalinaed ti kinasalun-at.

Mairugi ti pannakaiyadal ti salun-at kadagiti pagadalan iti elementaria tapno mammuan ken maawatan dagiti ubbing ti kinapateg ti panangilala ti salun-at babaen ti panangsurot kadagiti pagalagadan iti nasalun-at nga estilo ti panagbiag a tatta ket maiyad-adal ti Philippine Nutrition Council babaen ti 10 a Bilin ti Pannangan ken Salun-at. Daytoy ti kaunaan ken kapigsaan a danog iti saksakit.  

Iti pannakailagip ti Health Education Week iti maikatlo a lawas iti Oktobre, napan ti PHO kadagiti pagadalan ti probinsia.

Inyadalda dagitoy a 10 a bilin ti kinasalun-at a mairamraman met laeng iti uneg ti klase.  Importante ngamin ti pannakiyadal ti salun-at kadagiti iskuela, kuna ni Pablico, tapno iti panagdakkel dagiti ubbing, agbalinton a paset ti panagbiagda nga inaldaw ti panangsurotda ti nasalun-at a panagbiag. Iti kastoy agbalinda a responsablena a parte ti pamilia, ken iti komunidad.

Ti Health Education Week, ket saanna laeng nga ipaganepgep ti pagrebbengan ti pamilia ken dagiti kamengna iti panangitunda iti nasalun-at a panagbiag.  Patibkerenna pay ti pamilia, a mangpatibker met iti pundasion ti komunidad ken panagprogreso ti pagilian, kuna ni Pabliko. # Source - (MCA/Imelda C. Rivero/PIA1 Ilocos Sur).

No comments:

Post a Comment